Жуырда «Бәйтерек» холдингінің «ҚазАгроҚаржы» АҚ еншілес кәсіпорны Солтүстік Қазақстан облысының Тайынша ауданында «Астық – STEM» ЖШС қаржыландыруы бойынша баспасөз-турын өткізді.
«Астық-STEM» ЖШС компаниялар тобы «ҚазАгроҚаржымен» Солтүстік Қазақстанда 2008 жылдан бері жұмыс істейді. Соңғы бірнеше жылда компанияның машина-трактор паркін жаңарту мақсатында 1 млрд 776 млн теңге сомасына техника сатып алынды. Соның ішінде, 2021 жылы «ҚазАгроҚаржы» ұйымымен 640 млн теңге сомасына, оның ішінде суаруға арналған жабдық – «тамшылатқыш жүйелер» туралы лизинг шарттары жасалған екен. Бұл биылғы республиканың көптеген өңірінде болған экстремалды қуаңшылық жағдайында өте пайдалы болды.
«Астық-STEM» жауапкершілігі шектеулі серіктестігінің өзі 2002 жылы құрылған, оның егістігінің жалпы ауданы 9 829 га құрайды, негізінен дәнді дақылдар, сонымен қатар майлы, жемшөптік дақылдар өсіреді. Мал басы 500 тұяқ сүтті қара малдан тұрады.
Баспасөз турында сөйлеген сөзінде «АСТЫҚ-STEM» ЖШС басшысы Сергей Звольский өзінің «ҚазАгроҚаржы» институтының жұмысына ризашылығын білдірді.
«Біз осы қаржы компаниясы арқылы сапалы техникалар алуға қол жеткізіп отырмыз. Соның ішінде биыл тамшылатып суаратын техникалар алдық. Соның нәтижесінде қуаңшылық болған жылдың өзінде картоп пен сәбізден жоғары өнім алдық. Сәбіздің гектар берекелігі тіпті 100 тоннаға жетті, картоптан да сондай өнім алуды болжап отырмыз», деді ол.
«ҚазАгроҚаржы» – ауыл шаруашылығы тауарларын өндірушілерге техника мен жабдықтар сатып алуда лизингтік қызмет көрсететін қаржы институты ретінде 2000 жылы құрылғаны белгілі. Компания еліміздің аграрлық секторындағы техникалық жарақтандыруды дамытуға ықпал ете отырып, өз қызметін 20 жылдан астам уақыт бойы ойдағыдай жүзеге асырып келеді. Осы жылдар ішінде ол шаруалардың арасында танымал компанияға айналды. 2021 жылдың наурызынан бастап «Бәйтерек» ұлттық басқарушы холдингі» АҚ құрамына енді.
Қазір «Бәйтерек» холдингі Мемлекет басшысының тапсырмасымен агроөнеркәсіптік блоктың еншілес компанияларын қайта ұйымдастыру бойынша жұмыстарын жалғастыруда. Фермерлер үшін тиімді болған қаржыландыру институтында да өзгерістер болуы мүмкін. Сондықтан да «ҚазАгроҚаржы» компаниясы мен оның филиалдары өз жұмыстарын ашық, тиімді жүргізіп, пандемияға қарамастан шаруаларға техниканы лизингке әперуді белсенді жүргізіп жатыр. Биыл ғана компания 6 мың бірліктен аса техника сатып алуды қаржыландырды. Бұл – трактор, комбайн, егіс кешендері және т.б. сияқты шаруаға аса қажет техникалар. Компанияның барлық өңірде 14 филиалы бар.
Барлық қызмет ету кезеңінде компанияның ауыл шаруашылығына салған инвестицияларының көлемі – 1 031,6 млрд теңгені құрады, бұл бюджеттен тыс жасалған инвестициялар көлемінің – 77%-ы.
Айта кететін болсақ, бүгінгі таңға дейін Солтүстік Қазақстан облысының диқандары барлық 3 млн гектарға жуық егіс алқабының 60 пайыздан артығын жинап алды. Тайынша ауданында болған баспасөз турында журналистерді астық алқаптарына да апарып, қайнаған тірлікті көрсетті. Мұнда барлық астықтың жартысы жиналып алынған.
Солтүстік Қазақстан облысы