Абай ауданы Қарағанды облысындағы экономикалық күш-қуаты мол, ауыл шаруашылығы өркендеген аймақтың бірі.
Қазіргі таңда аудан орталығы Абай қаласында аулаларды абаттандыру жұмыстары қауырт жүріп жатыр. Жергілікті билік ойын алаңдарын орнатып қана қоймай, жолдың бір бөлігін кеңейтіп, асфальт төсеп, жол төсемдерінен жаяу жүргіншілер жолдарын жасады. Бұл өзгерістерді бірнеше жыл күткен тұрғындардың қуанышында шек жоқ. Абай қаласының әкімі Медеу Ахметов биыл алты ауланың абаттандырылғанын айтады.
– 2025 жылға дейін жылына бес-алты ауладан абаттандырамыз. Бұдан бөлек, биыл 8 шақырымнан астам жолды жөндедік. Төрт үлкен көшеге асфальт салып, жеке сектордың 10 көшесіне жол төселді, – дейді ол.
Абай қаласында заманауи балалар және спорт алаңдары орнатылып, тұрғын үйлер құрылысының да белсенді жүргізіліп жатқанын айта кеткен ләзім. Мысалы, қазіргі уақытта қаладағы Жеңіс даңғылы бойында жеке инвестициялар есебінен бес қабатты тұрғын үй салынуда. Құрылыс салушының жоспары бойынша, 2022 жылы 45 пәтер пайдалануға берілмек. Биыл Абай ауданы бойынша 168 отбасы баспаналы болады. Оның ішінде Топар кентінің баспанаға зәру 18 тұрғыны қазірдің өзінде қуанышқа бөленді. Сондай-ақ алдағы уақытта тұрғын үй-коммуналдық шаруашылық саласын жаңғырту бағдарламасы аясында тұрғындардың өтініші бойынша көпқабатты үйлердің бірі жөнделе бастайды. Тұрғындардың өзі де бұл бағдарламаға қатысып, үйлерінің шатырын жөндеп алу мүмкіндігіне ие болды. Абай қаласы мен Қарабас кентіндегі ұзындығы 64 шақырым болатын кәріз жүйелері жаңадан салынып, кәріз тазалау стансасы қайтадан жаңартылып, алдағы қараша айында іске қосылмақ.
Алдағы уақытта Абай ауданы егіс алқаптарынан мол өнім алуды жоспарлап отыр. Аудан әкімі Бауыржан Асановтың мәліметіне сай, биыл астық жинау алқабы 40 мың гектарды, картоп 5 902 гектарды және көкөніс 1 001 гектарды құрайды.
– Абай ауданы Қарағанды облысы көлемінде 52,5% картоп және 61,9% көкөніс өндіреді. Егін ору науқанына 108 астық жинайтын комбайн тартылған. Картоп жинауға 20 комбайн мен 25 қазғыш қатысады, деген ақпарат берді аудан басшысы.
Айта кету керек, жергілікті билік ауыл шаруашылығы тауарын өндірушілерге қолдан келген қамқорлықты жасап бағуда. Мысалы, биыл олардың қажетіне 2 500 тонна арзандатылған дизель отыны бөлініпті.
Биыл Абай ауданында ауыл шаруашылығы саласында жеті бірдей инвестициялық жобаны жүзеге асыру жоспарланған. Мысалы, аудандағы ірі кәсіпорын «Астра-Агро LTD» компаниясы 500 басқа арналған тауарлы сүт фермасын салмақшы екен. Бір өзі 30 адамға жұмыс беретін жаңа нысан 2023 жылы пайдалануға беріледі деп жоспарланған. «Астра-Агро LTD» ЖШС – еліміздегі картоп тұқымының оригинаторы мәртебесіне ие жалғыз компания. Биылдың өзінде фермерлер экспортқа екі мың тоннаға жуық элиталық тұқым жіберді.
Сонымен бірге ауданның беткеұстар кәсіпорнының бірі «Шанс» шаруа қожалығы да 400 басқа арналған тауарлы сүт фермасын салып жатыр. Мұндағы жем зауытының құрылысы инвестиция есебінен жүргізілуде. Аса қажетті Petkus астық тазалау машинасы алынған.
Жалпы, аудан бойынша биылғы күткен мол өнімнің далада қалмасы белгілі. Өйткені аймақта 44 жеміс-көкөніс қоймасы және 24 астық қоймасы бар.
Қарағанды облысы,
Абай ауданы