Қарт Каспийдің жағалауынан жеткен өнер көші астана халқына тамаша тарту жасады. Ел Тәуелсіздігінің 30 жылдығы аясында 9-12 қараша күндері Нұр-Сұлтан қаласы әкімдігінің «Жастар театры» сахнасында Нұрмұхан Жантөрин атындағы Маңғыстау облыстық музыкалық драма театрының гастролі өтті.
«Жантөриндіктер» төрт күн бойы Жастар театры төрінде репертуарындағы ең үздік деген таңдаулы қойылымдарын бас шаһар көрермендері назарына ұсынды. Атап айтсақ, өнер сапарының шымылдығы белгілі ақын, «Құрмет» орденінің кавалері, «Ерен еңбегі үшін» медалінің иегері Светқали Нұржанның «Хан кегі» поэтикалық драмасымен (режиссері Г.Мерғалиева) ашылса, 10 қараша күні якут режиссері Сергей Потаповтың Гарсиа Лорка драматургиясы негізінде сахналанған «Бернарда Альбаның үйі» драмасы қойылды. Ал 11 қарашада орыс тілінде қойылған режиссер Гүлсина Мерғалиеваның «Дикие истории 16+» спектаклі (авторы Дон Нигро), 12 қараша күні кино және театр актері, драматург Нартай Сауданбекұлының «Әлиханның аманаты» (режиссері Г.Мерғалиева) реквием-драмасы көрсетілді.
Нұрмұхан Жантөрин атындағы Маңғыстау облыстық музыкалық драма театры Қазақстан Республикасының Тұңғыш Президенті – Елбасы Нұрсұлтан Назарбаевтың бастамасымен 2003 жылдың 21 наурызы күні ашылды. Ең алғаш театрдың үлкен залында көрермен назарына Ғ.Мүсіреповтің «Қыз Жібек» спектаклі, екінші залында Т.Әліпбаевтың «Томирис» драмасы ұсынылып, қос қойылым да жұртшылық тарапынан жоғары бағаланды. 2006 жылы Маңғыстау облыстық музыкалық драма театрына Қазақстанның халық әртісі, Мемлекеттік сыйлықтың лауреаты Нұрмұхан Жантөриннің есімі берілді.
Осы жылдар ішінде іргелі өнер ұжымы әртүрлі жанр, алуан тақырыптағы спектакльдерді сахналап, көрерменге ұсынып келеді. Театр репертуарындағы әлем сахналарынан мәңгілік орын алған У.Шекспир, Ж.Мольер, Ф.Эрве, А.Чехов, Н.Гоголь, Ш.Айтматов сынды классиктермен қатар, қазақ драматургиясының негізін қалаған М.Әуезов, Ғ.Мүсірепов, драматургия саласында сүбелі сахналық туындылар қалдырған Ә.Кекілбайұлы, Д.Исабеков, С.Балғабаев, Е.Раушанов, көршілес елдер драматургтерінен С.Ахмад, М.Байджиев, Г.Хугаев, З.Зайнуллин, сондай-ақ Маңғыстау өңірінен шыққан ақын, жазушылар – С.Назарбекұлы, С.Адай, С.Нұржан, С.Құдайбергенов секілді басқа да авторлардың туындылары бар.
Құрылғаннан бергі 19 жыл ішінде көптеген ірі халықаралық деңгейдегі фестивальдардан олжалы оралып келген жас театр әрдайым қоғамдағы саяси-мәдени өзгерістерге бейтарап қарамай, үнемі өз үнін қосып келе жатыр. Бүгінде театрдың репертуар қоржынында 90-ға тарта үлкендерге арналған, 20-ға жуық балаларға арналған қойылым бар. Соның бір парасын елорда тұрғындары мен қонақтары назарына ұсынған ізденгіш ұжым өздерінің қай кезде де шығармашылық бабында екендіктерін тағы бір мәрте дәлелдей түсті. Көрерменнің рухани-эстетикалық талғам-көзқарасының қалыптасуына айрықша үлес қосып жүрген өнер ордасының бұл сапары бас шаһар халқына шын мәнінде тамаша тарту болды.