Азаматтық форум өз деңгейінде ұйымдастырылуы тиіс

«Қоғам мен мемлекеттің тұрақты дамуы мүддесіндегі әріп­тестіктің 30 жылдығы» ме­рей­тойлық X Азаматтық фо­румы 2021 жылғы 22-26 қара­ша аралығында өтеді. Фо­рум­ның іс-шаралары демо­кра­тиялық процестерді дамыту, Қазақстанда БҰҰ-ның Тұрақты даму мақсаттарын іске асыру мә­селелеріне, сондай-ақ соци­ум­ның, мемлекет пен биз­нестің оларға қол жет­кізудегі негізгі мін­деттеріне арналады. Фо­рум бағдарламасы көптеген тақы­рып­ты, сарапшылар мен қаты­сушыларды қам­тиды. Сондай-ақ форум аясында 30-дан астам пі­кірталас алаңы, сараптамалық тал­қылау, фасилитациялық және па­нельдік сессия ұйым­дас­тырылады.

Форум қарсаңында және апта бойы министрлердің аза­мат­тық қоғам өкіл­дерімен кезде­су­лері, әкімдердің өңір­лер­дегі ҮЕҰ өкілдерімен кез­десулері, ша­ғын гранттар жоба­ларының та­ныс­тырылымы, сон­дай-ақ «ҮЕҰ сыйлығы» мен «Таң­дау» сый­лы­ғын салта­натты түрде тапсыру рәсімі ұйымдастырылады.

Мадияр Қожахметтің ай­ту­ын­ша, форумның мазмұнды бағ­­дарламасы аза­маттық қоғамда туындаған барлық проб­­лемалық мәселені: қоғам­дық ба­қылау тетіктерін жетіл­діруден бас­тап, әлеуметтік сала­ның, цифр­ландырудың, білім беру және денсаулық сақтау жүйелерінің өзекті мәселелерін ше­шуге дейін қамтуға мүмкіндік береді. Ол: «2003 жылы Елба­сы­ның бастамасымен өткен қа­зір­гі Азаматтық форум Тәуелсіздігіміздің 30 жыл­дығы бел­гісімен өтуде», деді.

Қазақстанның Азаматтық альян­сының президенті Бану Нұрғазиева: «Мемлекет пен үкі­меттік емес сектордың өзара іс-қи­мылы саласындағы ел­дің ең ірі оқиғасының негізгі идеясы – Қазақстанның азамат­тық қоға­мына жаһандық көзқа­рас. Біз азаматтық қоғамды дамы­ту­дың өзекті мәселелерін ескере оты­рып, тарихқа, бүгінге және бола­шаққа талдау жасағымыз келеді. X Азаматтық форумның маз­мұнды бағдарламасы барлық қаты­су­шыға мемлекеттік ор­гандар мен ҮЕҰ бірлескен коо­пера­ция­сының жүйелі мәсе­лелері мен ше­шімдері туралы айтуға мүмкіндік береді», деді.

Сондай-ақ брифинг спи­кер­лері сани­тарлық-эпидемиялық нор­маларды сақтау қажеттігін ес­кере отырып, форум офлайн жә­не онлайн, яғни гибридті форматта өте­тінін айтты. Мысалы, Алма­тыда өтетін іс-шараларға 150 де­легат қатысады. Со­нымен қатар іс-шараларды өткізу мүм­кін­­діктері мен онлайн форма­тының арқа­сында X Азамат­тық форум жұмысына Қазақ­­стан­ның түкпір-түкпірінен ҮЕҰ, мемле­кеттік органдар, са­рап­шылар қоғам­дастығы мен БАҚ-тың барлығы 20 мыңнан астам өкілі қатысады деп күті­луде.

Форум апталығының он­лайн-транс­ляциясы Facebook па­рақ­шасында және YouTube ар­насында жүргізіледі. Форум сайтында мерейтойлық Х Азаматтық форумға тіркеу ашылды.