Балғын балуандар белдесті

Даңқты балуан Дәулет Тұрлыхановтың жүлдесі үшін ұйымдастырылған жарыста Үржар, Аягөз, Жарма, Тарбағатай және Көк­пекті аудандарынан, Өскемен мен Семей қалаларынан келген жас спортшылар бақта­рын сынады.

Іс-шараға аудан басшылығы, облыстық Грек-рим, еркін күрес және әйелдер күре­сі федерациясының төрағасы Марат Мұза­паров, бокстан ел құрамасының бас жат­тықтырушысы Қайрат Сәтжанов, грек-рим күресінен КСРО спорт шебері, Қазақ­стан Республикасының еңбек сіңірген жат­тықтырушысы Қайыртай Оразалинов құр­метті қонақтар қатарында қатысты. Аудан спортының ардагерлері де жарыстың төрінен табылды.

Жарыстың ресми ашылу салтанатында құттықтау сөз сөйлеген аудан әкімі Раджан Сейтқанов жас ұрпақты саламатты өмір салтын ұстануға шақырып, спортқа баулитын іс-шаралардың маңызды екенін ерекше атап өтті.

Балғын балуандардың екі күнге созылған боз кілемдегі белдесулері тартысты өтті. Әр­қайсысы намысты қолдан бермеуге тырысты, бар күш-жігерлерін салды. Ашық біріншілік болғандықтан, бұл сайыста 180 спортшы 11 салмақ дәрежесі бойынша өзара сынға түсті. Нәтижесінде, 44 балуан жүлдегер атанып, оларға арнайы дайындалған медаль мен мадақтама қағаздары, чемпиондық белбеулер мен ұлттық құраманың күрес формалары тапсырылды.

Ауданда алғаш рет өткізілген облыс деңгейіндегі жарыстың ұйымдастырылуына көрермендер де ризашылықтарын білдірді.

– Семей қаласы құрамасының аға жаттықтырушысы ретінде турнирге 40-тан астам жас балуан алып келдік. Көкпекті ауданында еліміздің мақтанышы, жастардың бой түзейтін темірқазығы Дәулет Тұрлыханов есімі ұлықталып жатқаны қуантады. Қажы­мұқан Мұңайтпасов, Жақсылық Үшкем­піров, Дәулет Тұрлыхановтай балуан­дар­дың есімдерін құлағына құйып алған ұр­пақ елжанды болып өседі, – дейді Қазақ­стан Республикасының еңбек сіңірген жаттықтырушысы Қайыртай Оразалинов.

Жарыс соңында байрақты бәсекені жоғары деңгейде ұйымдастырған Аслан Балабекұлы облыстық грек-рим, еркін күрес және әйелдер күресі федерациясы төрағасының Алғыс хатымен марапатталды.

Шығыс Қазақстан облысы,

Көкпекті ауданы