Павлодар облысында құқық қорғау органдарының қызметкерлері жедел жәрдем көлігін мас күйінде тізгіндеген жүргізушіні тоқтатты, деп хабарлайды Egemen.kz.
Оқиға 5 желтоқсанда орын алып, «Құқықтық тәртіп» жедел алдын алу іс-шарасы аясында анықталған.
Сағат 00:15 шамасында Тереңкөл ауданының полиция қызметкерлері ЖҚС-да «Жедел жәрдем» көлігін тоқтатқан. Құжаттарды тексеру барысында инспекторлар жүргізушінің салғырттығын байқаған. Куәландыру жүргізіліп, оның нәтижелері бойынша жүргізушінің мас күйінде болғаны анықталды.
«Жүргізушіге қатысты ҚР ӘҚБК 608-бабы бойынша әкімшілік іс қозғалды, материал сотқа жолданды», дейді Павлодар облысы ПД жергілікті полиция қызметінің бастығы Ғалым Сарғұлов.
Ведомствода атап өткендей, аудандық аурухананың аға механигіне қатысты ҚР ӘҚБК 619-бабы бойынша әкімшілік материал жасалып, 40 АЕК айыппұл салынды.
Айта кетсек, жедел алдын алу іс-шарасының алғашқы күнінде 650-ге жуық құқық бұзушылық анықталған.
Спирттік ішімдіктерді ішкені немесе қоғамдық орындарға мас күйінде барған 100-ге жуық азамат жауапкершілікке тартылса, олардың 14-і автокөлікті мас күйінде басқарған.