Көкала дала дөңгеленіп, көкжиектегі бұйрат-бұйрат төбелер қалқып тұрғандай көрінеді. Қайда барсаңыз да сол қазақтың тағдыры жастанған томаға топырақ. Топырақ күбірлейді, мұң шағады. Әрине, еститін құлақ, көретін көз болса...
Құйқалы мекеннің күздегі көрінісі көңіл тербейді. Желдің дауысы жаңғырып тұрғандай. Дала мимырт әрі шулы. Қураған қу тақыр тірліктің бір сәттік сызбасы. Бақсаңыз, белгілі суретші Камиль Муллашевтің «Қыркүйектегі құла дала» картинасы бізге туған жеріміздің тамашасын тарту етіп тұрғандай.
Біз осыған дейін жазғанбыз, жалпы Камиль Муллашевтің картиналары мәнді метафораларға, символдардың жүйесіне, автордың қиялы мен ішкі дауысына сүйенеді. Олар өзінің біртумалығымен, бейнелілігімен және айбындылығымен таңғалдырады.
Қылқалам шеберінің шығармашылығы – Қазақстанның рухани-мәдени өмірінің бір бөлігі. Ел мен жердің тарихынан, өмірінен, шежіресінен сыр тартады. Сол ескі де есті заманды көркем бейнелеудің шебері. Оның туындыларының дені пейзаж жанрына жатады.
«Қыркүйектегі құла дала» картинасында суретші дала тақырыбын қозғайды. Туынды кеңестік кезеңде реалистік мәнермен жазылған. Бір ғажабы – тұмса табиғатымыздың алуан түрлілігін көрсетеді. Біздің алдымыздан құла дала, көкжиекке ұмсынған аласа таулар шығады. Құдды қол созым жерде тұрғандай күйге бөлейді.
Картина оқырманды сұлу да нәзік бояуларымен, түстердің көркем ауысуымен және реңктік қатынастардың үйлесімді сындарлығымен өзіне тартады.
Туынды жұмсақ жоса, жасыл-қоңыр түстермен жазылған. Бояулар солғын және қоңырқай. Суретші кеңістікте көсіліп жатқан еркіндік пен мөлдірлікті ерекше жеткізе білген. Дала пейзажы құстай азат өмірдің ләззатын сезіндіреді.