Аралас жекпе-жектен Біріккен Араб Әмірліктерінің бас шаһары – Абу-Дабиде өткен әлем чемпионатында қазақстандық спортшылар жасындай жарқылдап, нәтижелі өнер көрсетті.
Атап айтқанда, 52,2 килоға дейінгі салмақта жұдырықтасқан Бағдат Жұбаныш финалда ресейлік Фархад Рахмоналиевті жеңіп, аралас жекпе-жектен үш дүркін әлем чемпионы атанса, Бекзат Жасия (65,8 кг) әлемдік додада ел қоржынына екінші алтынды салды. Жерлесіміз финалда испаниялық Хуан Изкуэрдоны төрешілердің шешімімен жеңді.
56,7 килода жұдырықтасқан Дастан Жақыпбеков күміс жүлдеге қол жеткізсе, Қазақстан әйелдер командасынан Айжан Әбдіқадыр (70,3 кг) да күміспен күптелді. Аса ауыр салмақтағы Расул Хатаев (120,2 кг) финалда ресейлік спортшыдан жеңіліп, екінші орынға табан тіреді.