Футзалдан Қазақстан құрамасының Нидерландта өтіп жатқан Еуропа чемпионатындағы сапары ширек финалмен аяқталды. Жерлестеріміз жартылай финалға жолдама беретін матчта Украина футзалшыларымен кездесіп, 3:5 есебімен жеңіліп қалды.
Украинаны Қазақстанның осы біріншіліктегі ең мықты қарсыласы болды деп айта алмаймыз. Әрине, құрлық чемпионатында осал команда жоқ, бірақ жерлестеріміз дәл осы украиналықтардан жеңілуге тиіс емес еді. Матч алдында бірқатар аузы дуалы футзал маманы мен букмекерлік кеңселер болжам жасап, Қазақстанның жеңісіне сенімді болған-ды.
Өйткені Кака шәкірттері топтық кезеңде жақсы нәтиже көрсетіп, өз тобында бірінші орынмен ширек финалға жолдама алды. Жерлестеріміз алғашқы ойында Словениямен тең ойнаса (4:4), кейінгі екі матчта азулы деген Италия (4:1) мен Финляндия (6:2) құрамаларын тізе бүктірді.
Украинаның топтық кезеңдегі жолына үңілсек, Александр Косенко баптайтын құрама А тобының бірінші турында жарыс қожайындары Нидерланд құрамасынан 3:2 есебімен жеңіліп, кейінгі матчта Сербияны 6:1 нәтижесімен қапы қалдырды. Соңғы турда былтырғы әлем чемпионы – Португалиядан жеңілді – 1:0. Үш ойында небәрі 3 ұпай олжалаған украиналықтар тек доп айырмасының нәтижесінде ғана келесі кезеңге өтті.
Матчқа тоқталар болсақ, бірінші таймда қарсыластарына қарағанда Қазақстан құрамасы ашық әрі жанкүйерлерге ұнайтындай ойын көрсетті. Дегенмен бірінші таймның аяқталуына бес минут қалғанда бас төреші біздің қақпаға пенальти белгіледі. Оны Петр Шотурма мінсіз орындап, құрамасын алға шығарды. Рикардо Кака шәкірттері бірінші таймда-ақ есепті теңестіруге тырысып, бірнеше рет алға ұмтылғанымен шабуылды нәтижелі түйіндей алмады.
Үзілістен соң Қазақстан құрамасы тәуекелге барып, қақпаны жиі бос қалдырды. Осының салдарынан қарсыластар ең алдымен 25-минутта қарымта шабуылда есепті еселесе, 30-минутта үшінші голды бос тұрған қақпаға енгізді. Ойынның аяқталуына екі минут қалғанда Дуглас пен Оразов есепті 3:2-ге дейін қысқартты. Есеп айырмашылығы қысқарғаннан кейін жанкүйерлердің де кеудесінде үміт оты маздады. Алайда ойыншылардың асығыстығынан бос тұрған қақпамызға тағы екі гол енді. Қорытынды есеп – 3:5. Осылайша, Қазақстан құрамасы үшінші Еуросын ширек финалда аяқтауға мәжбүр болды.
Өкініштісі, кешегі матчта алдыңғы ойындарда екінші «сары қағаздарын» алған Тайнан мен Эдсонның жоқтығы қатты білінді. Сондай-ақ шабуылшы Азат Валиуллин жарақатымен, Шыңғыс Есенаманов бір апта карантинде болып, жаттығу жасамағандықтан, дұрыс ойнай алмады.