Алматыда қылмыстық топ бақылауындағы компаниялар арқылы ұйымдарға салық төлеуден жалтару бойынша көмектескен, деп хабарлайды Egemen.kz қаржы мониторингі агенттігінің баспасөз қызметіне сілтеме жасап.
Алматыда материалдық сыйақы үшін жалған шот-фактуралар мен бухгалтерлік құжаттар жасаумен айналысқан, құрамында жеті адам бар қылмыстық топқа қатысты сотқа дейінгі тергеу аяқталды.
«Бұл тұлғалар 2018 жылдан бастап 2020 жылға дейін коммерциялық ұйымдарға жалпы сомасы 3 миллиард теңгеден асатын 4 коммерциялық компания арқылы салық төлеуден жалтару бойынша көмектесті. Сондай-ақ айыпталушылар тұрғылықты жерінде салмағы 849 грамм болатын тыйым салынған «марихуана» есірткісін өсіргені анықталды», делінген хабарламада.
Сот үкімімен айыпталушылар Қылмыстық Кодекстің 216-бабы 3-бөлігі «Іс жүзінде жұмысты орындамай шот-фактура жазу бойынша іс-әрекеттер жасау» бойынша кінәлі деп танылып, оларға 3 жылдан 4,8 жылға дейін түрлі мерзімге бас бостандығынан айыру жазасы тағайындалды.
Алматы полициясы тыйым салынған есірткі заттарына қатысты істі тергейді.