Елордадағы Президенттік клиникада тік ішек қатерлі ісігі диагнозы қойылған пациентке алғаш рет эндоскопиялық тәсілмен операция жасалып, қауіптің беті қайтты.
Осыдан төрт ай бұрын Президенттік клиникаға тексерілуге келген Жанат Күзденованы еш жері ауырып мазаламаған екен. Жай ғана тексерілмек болған пациенттен қасерлі ісік табылады. Биопсия жасау үшін үлгі алынып, оның нәтижесінде қатерлі ісіктің өсіп жатқаны белгілі болған.
Сонымен, дәрігердің кеңесімен пациентке эндоскопиялық әдіспен операция жасалды. Президенттік клиника мамандары эндоскописті ашық араласусыз, денеге табиғи саңылау жасау арқылы оны алып тастады. Қазіргі уақытта пациент өзін жақсы сезінетінін айтты.
«Тексеру нәтижесінде ісік табылды. Дәрігер-эндоскопист Жеңісбек Тынкозиев консультация беріп, эндоскопиялық операция жасауды ұсынды. Яғни іш қуысына ашық операция жасалмайды екен. Әрине, қауіп те бар еді. Бірақ операция сол кездегі жалғыз, дұрыс шешім болды. Оның үстіне дәрігердің кәсібилігіне сендім. Операциядан кейінгі кезең жақсы өтті, қазір денсаулығым жақсы, дәрігердің ұсыныстарын орындап отырдым. Міне, төрт ай өтті, өзімді жақсы сезінемін», дейді Жанат.
Операция эндоскопиялық тәсілмен жасалғандықтан, пациент операциядан соң екі сағаттан кейін үйіне шығарылды. Үш айдан кейін қайта тексеру жүргізілді. Тексеру нәтижелері таңғаларлықтай.
«Өкінішке қарай, мұндай операцияға барлық пациент жарай бермейді. Операциядан кейін ісіктің орнын мұқият тексердік. Үш ай ғана өтті ғой, ал операция бір жыл бұрын жасалған сияқты. Мұндай нәтижеге қалай қуанбайсың», дейді дәрігер Ж.Тынкозиев.
Оның айтуынша, ерте сатыда жаңа дамып келе жатқан кішкентай ісіктерді эндоскопиялық әдіспен алып тастауға болады. Сондықтан да дәрігер адамдарға өз денсаулығын үнемі тексеріп, бақылап отыруды ұсынады.