Чемпиондар лигасының екінші күніне жоспарланған тағы екі ойынның бірінші кездесулері аяқталды. Сәрсенбі күні «Ливерпуль» – «Интер» және «Ред Булл Зальцбург» – «Бавария» клубтары жасыл алаңда жолықты.
Италиядағы «Джузеппе Меацца» стадионындағы тартысты бәсекеде «Интер» ағылшындық командадан 0:2 есебімен жеңіліп қалды. «Ливерпуль» сапынан 75-минутта Роберто Фирмино есеп ашса, араға тоғыз минут салып, Мохаммед Салах таблодағы көрсеткішті 2:0-ге жеткізді. Осы есеп матч соңына дейін сақталып қалды.
Екінші кездесуде Аустрияның «Ред Булл Зальцбург» ұжымы өз алаңында Германияның «Бавариясын» қабылдап, 1:1 есебімен тең түсті. Ойынның есебін 21-минутта алаң иелері ашты. Гол авторы – Чиквубуйке Адаму. Ал қонақтар сапынан 90-минутта Кингсли Коман мергендігімен көзге түсіп, командасын жеңілістен құтқарып қалды.