Күнтізбені қасіретпен айғыздаған «Қаңтар оқиғасы» отандық суретшілердің кенебінен көрініс таба бастады. Қылқалам шеберлерінің қолтаңбасы олардың оқиғаға деген көзқарасы ғана емес, қаншалықты ауыр болса да біздің тарихымыздың бір бөлігі.
Ойда жоқта болған ойраннан ең көп зардап шеккен аймақ – Алматы қаласы. Ешкімді алаламайтын арман қаланың сол сәттегі сүреңсіз кейпі талайлардың жанын ауыртты. Осы бір сезімді бояу тілімен бере алған картиналардың бір шоғырын Мемлекеттік орталық музей қабырғасынан ашылған «Менің Қазақстаным – менің отбасым» көрмесінен кездестірдік. «Алмалы Палитра» суретшілер қауымдастығы ұсынған көрменің басты тақырыбы – қатер құшағындағы мегаполис һәм қайта тұтанған үміт шырағы. Белсенді суретшілер өз жұмыстарында еліне деген сүйіспеншілігін, қолдауын және махаббатын көрсете білген.
– Жыл басында орын алған «Қаңтар оқиғасы», әрқайсысымызға сүйікті қаламыз Алматының маңызды екенін, тіпті өмір құндылығын ұғындырды. Көрме 35 суретшінің жұмысын біріктіріп отыр. Келушілер назарына – бейнелеу өнері, акварель, графика, сәндік қолданбалы өнер және тағы басқа жанрдағы шығармалар ұсынылған. Көркем туынылар қаламыздың тарихын, сонымен қатар әр ғимараттың тарихи құндылығын, олардың біз үшін қаншалықты бағалы екенін қаперімізге салады. Бостандық пен бейбітшілік – баға жетпес құндылық. Суретшілеріміз де бұл біздің берік ұстанымымыз екенін айшықтауға тырысқан. Айналамыздағы тұмса табиғат, тұрғындардың бақытты өмірі, алаңсыз тіршілік – өмірдің жарқын келбеті. Әр шығарманың астарында осындай ой жатыр, – дейді көрме жетекшісі Лидия Дроздова.
Өнер жәрмеңкесі қылқалам шеберлерінің арман қалаға деген іңкәрлігін паш етеді. Өнер – уақыт үнін тарихқа таңбалаудың бір тетігі екенін ескерсек, көрме ашыла салысымен суреттерді сатып алуға қызығушылық танытқандар қатары артқан. Ұйымдастырушылар кейбір картиналар Мемлекеттік Орталық музей қорын толықтыратынын айтады.