Үстіміздегі мамыр айының басындағы тамаша мерекелер қарсаңында еліміздің рухани орталықтарының бірі – Семейде Қазақстан Республикасы Тұңғыш Президенті мұражайының көшпелі көрмесі ашылды. Мұнда алғаш рет өткізіліп отырған бұл көрмеге 200-ден астам экспонат қойылған.
Олардың ішінде түрлі тарихи құжаттар көшірмелерімен бірге сан ондаған мемлекет басшылары тарапынан Елбасымызға тартылған көздің жауын алатын нақтылы тартулардың түпнұсқалары да бар. АҚШ, Қытай, Ресей, Үндістан және басқа да ірі мемлекеттер атынан сыйланған мұндай тартулар біздің егемен еліміз бен сол егемен еліміздің шаңырағын шайқалтпай алып келе жатқан Елбасымызға деген шынайы құрметті аңғартса керек. Шындығында, бүгінгі күні Еуропа төріндегі ЕҚЫҰ секілді мәртебелі ұйымның тізгінін қолында берік ұстап отырған, жуырда ғана Нью-Йоркте өткен салиқалы саммитте өміршең бастамаларымен көзге түскен, ал алдағы жылы Ислам Конференциясы Ұйымына басшылық етуге дайындалып жатқан біздің ел қандай құрметке болсын лайық екендігіне кімнің дауы бар.
Еліміздің тұңғыш Президенті мұражайының осындағы Невзоровтар отбасы атындағы көркемөнер мұражайында өткізіліп жатқан бұл көшпелі көрмесі осы айдың ортасына дейін жалғасады.
Дәулет СЕЙСЕНҰЛЫ,
СЕМЕЙ.