«Ассамблея жастары» ағаш көшеттерін отырғызды

Іс-шара барысында спикерлер табысқа жету және жеке өсу дағды­ларын дамыту бойынша пайдалы кеңес­тері­мен бөлісті. Қатысушылар өздерін қызықтырған сұрақтарын қойып, ауыл­дық деңгейде жастар саясатын жетілдіру­дің өзекті тақырыптарын талқылады.

Сонымен қатар «Ассамблея жастары» ұйымының көшбасшылары «Таза орта» жобалық бағыты аясында эко­логиялық акция өткізді. Ұйғыр ауданы­ның орталығында жергілікті жастармен бірлесіп, «Достық аллеясына» ағаш отырғызды. Бұл күні белсенділер 50 қылқан жапырақты ағаш көшетін екті. Олар келешекте ауданның көз тартар көрікті жеріне айналары сөзсіз.

«Бұған дейін Мемлекет басшысы 2 млрд ағаш отырғызу туралы бастама көтерген. Біздер – жастар өз күшіміз­бен елімізді көгалдандыруға көмек­тесуге тырысамыз. Біз Ұйғыр ауданындағы Достық аллеясын түрлі этнос өкілдерінің: қазақ, ұйғыр, татар, орыс және т.б. күші­мен орнаттық. Ал осындай бірлескен жасампаздық іс-шаралар жастарымыздың бірігуіне ықпал етеді және бұл аллея аудан тұрғындары үшін жақсы сыйлық болады деп үміттенеміз», деді «Ассамблея жас­тары» РҚБ төрағасы Тимур Жұмырбаев.

Іс-шараға қатысушылар осындай жастар бастамаларын іске асыру басқа өңірлерде де жалғасатынын атап өтті. Естеріңізге сала кетейік, экологияны сақтау және қоршаған ортаны қорғау – «Ассамблея жастары» ұйымы қызметінің маңызды бағыттарының бірі. Сондай-ақ ұйым белсенділерінің жоспарында басқа өңірлерде «Халық достығы» саябақтарына ағаш отырғызу да бар. Бұл бастаманы былтыр қазан айында ҚХА кеңесінің кеңейтілген отырысында Мемлекет басшысы ұсынған.

Алматы облысында өткен іс-шара­ларға «Ассамблея жастары» РҚБ төрағасы Т.Жұмырбаев, ASAR-UME қоры­ның негізін қалаушы және Президент жа­нындағы жастар саясаты жөніндегі Кеңес­тің мүшесі А.Нұрмашев, Қазақстан ұй­ғыр жастары одағының төрағасы Р.Қай­рыев, «Ассамблея жастары» РҚБ Алматы облы­сын­дағы өкілдігінің төрағасы Р.Уса­нова және жастар ұйымдарының өкіл­де­рі, ерік­тілер мен жергілікті тұрғындар қатысты.