Ұлы Отан соғысы! Адамзат тарихында дәл осындай сұрапыл болған емес. 30 миллионға жуық адам оққа ұшты, сан мыңдаған боздақ қыршын кетті. Концлагерьлерде жантүршігерлік азаптан өлгендер мен зорлық-зомбылыққа ұшырағандардың жан тәсілімі әлі күнге естілетіндей. Фашизмнің қатыгездігі мен жыртқыштығы ортағасырлық инквизациядан әлдеқайда асып түсті. Адамзаттың жартысын – құлдық, жартысын жойылып кету қаупі күтіп тұрды. Тіршіліктің тынысы тарылды.
Міне, осындай ақырзаманнан жер-жаһанды құтқарып қалған ерлерді адамзатты азат етушілер десек лайықты. Бүгінде сол қаһармандардың қатары әбден сиреген. Қазақстан Республикасында олар – 6300 ғана. Көбінің жасы тоқсаннан асқан. Мәскеуді қорғаған, Киевті азат еткен, Еуразияға тыныштығын қайтарып берген, Берлинге жеңіс туын тіккен батырлар енді ақсақалды алдиярлар.
Осы ардақты аталарымызды, баршамызға бүгінгі бейбіт өмірді сыйлаған асылдарымызды Ұлы жеңістің 70 жылдығы қарсаңында ұлағатты елге тән құрметпен қуантайық. Оларды қарағандылықтар секілді коммуналдық-тұрмыстық төлемдерден біржола босатайық. Суды да, жылуды да, электр қуатын да тегін пайдалансын. Кеудесін оққа төсеген ерлерді өнегелі ұрпақтың жүрек жылуына осылай бөлейік дегім келеді.
Алдан СМАЙЫЛ,
Мәжіліс депутаты.