Шымкентте Amanat партиясының атқарушы хатшысы Асхат Оралов медицина қызметкерлері, бастауыш партия ұйымдарының төрағалары, партияның қалалық активімен бірқатар кездесу өткізді. Сондай-ақ ол қаладағы дендрологиялық саябақта жастар қанатының белсенділерімен бірге TazaLike жобасының алғашқы іс-шарасын өткізді.
Іс-шараға 100-ден астам жас қатысып, олар Асанбай Асқаров атындағы қалалық дендросаябаққа 200-ден астам көшет отырғызды. А.Оралов бұл жобаның басты мақсаты азаматтардың экологиялық мәдениетін арттыру, қоршаған ортаны таза ұстауды күнделікті өмір салтына айналдыру және ресурстарды үнемді пайдалану мәдениетін дамыту екенін атап өтті.
«Партия кәсіби экологтерді, белсенділер мен еріктілерді жұмылдырып, жыл бойы түрлі экологиялық акция өткізетін болады. Жаңа экологиялық жоба әрбір өңірде, әрбір аудан мен ауылда қолдау табатынына күмәніміз жоқ. Өйткені жерімізді таза ұстап, елімізді көркейту – басты міндеттеріміздің бірі», деп атап өтті А.Оралов.
Сондай-ақ партияның Атқарушы хатшысы қалалық Онкологиялық орталықта болды. Аталған орталықта Amanat партиясының сайлауалды бағдарламасын іске асыру аясында позитронды-эмиссиялық томография (ПЭТ) түсіруге арналған жабдық орнатылған.
Орталық ұжымымен кездесуде ұлт денсаулығы партияның басты басымдықтарының бірі екендігі айтылды. Еліміздегі 75 мыңға жуық медицина қызметкері – партия мүшелері. Бұл аманаттықтардың жалпы санының шамамен 10 пайызын құрайды.
«ПЭТ зертханасы бұған дейін тек Алматы мен елордада болды. Енді Шымкенттің және оған жақын орналасқан өңір тұрғындары жолға уақыт пен қаражат шығындамай, заманауи жабдықта тегін тексеруден өте алады. Позитронды-эмиссиялық томографияның бірегейлігі – онкологиялық өскіндерді ерте сатысында анықтауға және тиісінше тиімді ем жүргізуге мүмкіндік береді», деді Қазақ онкология және радиология ғылыми-зерттеу институтының басқарма төрайымы Д.Қайдарова.
Сонымен қатар Шымкентте қаладағы бастауыш партия ұйымдары төрағаларының жиналысы өтіп, онда жергілікті жерлерде партияның жаңа жобаларын сапалы жүзеге асыру мәселелері талқыланды. Бүгінде қалада құрамында 31 мыңнан астам партия мүшесі бар 51 бастауыш партия ұйымы жұмыс істейді.
Осы күні А.Оралов Шымкенттің партия активімен де кездесіп, ел Президентінің Жолдауында жарияланған реформаларды сапалы жүзеге асыру үшін партия модернизациясының басымдықтарын талқылады.
«Қаламызда жұмыс істемейтін, оқымайтын және жұмыс табуға талпынбайтын NEET санатындағы жастардың үлесі – 6,7%, яғни 15 мыңға жуық адам. Аmanat партиясының алдында осы санаттағы адамдарды әлеуметтендірудің тиімді шешімдерін әзірлеу бойынша қыруар жұмыс тұр», деді кездесу барысында Шымкент қалалық Жастар ресурстық орталығының жетекшісі М.Исахов.