Қазақстандық жас теннисшілер шетелдерде өтіп жатқан бірнеше халықаралық турнирде чемпион атанды.
Мәселен, Ыстанбұлда ұйымдастырылған төртінші санаттағы ITF Juniors додасында Асылжан Арыстанбекова мен Айя Нұпбай жұптық сында топ жарды. Олар финалда қазақстандық Карина Жұмажанова мен мысырлық Мариам Ибрахимді 6:1, 6:2 есебімен ұтты. Бір апта бұрын Асылжан мен Айя Ыстанбұлдағы тағы бір жарыста үздік шыққан еді.
Ал Душанбеде 18 жасқа дейінгі теннисшілер арасында өткен дәл осындай халықаралық турнирде Артур Хайрутдинов пен Ислам Орынбасарға тең келер ешкім табылмады. Олар соңғы бәсекеде Беларусь өкілі Артем Алексейчук пен Герман Думшеден айласын асырды – 6:2, 7:5. Осы жарыста Исламның абсолютті чемпион атанатындай мүмкіндігі болған еді. Алайда ол жекелей сынның финалында ресейлік Олег Колниновқа жол берді.
Сондай-ақ Словениядағы 14 жасқа дейінгілер арасындағы Tennis Europe – Grawe Open сериясымен өткен додада Дамир Жалғасбай жұптық сында чемпиондық атаққа қол жеткізді. Ол украиналық Никита Белозертцевпен бірге финалда жарыстың алтыншы ракеткалары, швециялық Линус Андерсон пен даниялық Мадс Брунхабиді жеңді – 4:6, 6:2, 10:4.