Әскердегі әдеби күн

Кездесуге әдеби журнал редак­ция­сының ұжымы, Павлодар педа­го­гикалық университетінің жанынан құрылған «Құсқанат-ғұмыр» әдеби бірлестігінің мүшелері, өңірге белгілі ақындар және сарбаздар қатысты.

Жас сарбаздардың жауынгерлерлік ру­хын көтеру мақсатында өткен жиын­ның бірінші бөлімінде бөлім сар­баздары арасында спорттық жарыс ұйым­дас­ты­рылды. Жауынгерлер ең әуелі кермеде тартылудан сынға түсті. Журнал редакторы Асыл Әбіш сарбаздарға сәттілік тілеп, кер­меге бірінші болып өзі тартылды. «Өздеріңдей білекті де, жүректі жа­уын­­герлермен жарысқа түсіп, бә­се­ке­лесейін деген ойымыз жоқ. Деген­мен сендердің шабыттарыңды оятып, жолдарыңды ашып беруге ниеттіміз», деген Асыл Әлімжанұлы 10 рет тартылып, көпшіліктің құрметіне бөленді. Кезек сарбаздарға жетті. Бөлімнің үш ротасының сарбаздарынан құралған командалық сында «Жауынгерлік қамтамасыз ету» ро­та­сының сарбаз­дары жеңімпаз атанды. Екінші орынды «Бірінші жедел мақсаттағы» рота иеленді. Ал «Екінші жедел мақсаттағы» рота сарбаздары үшінші орынға тұрақтады.

Бұдан соң сарбаздар жауынгерлік эстафетадан бақ сынасты. Бұл бәсекеде «Екінші жедел мақсаттағы» ортаның бағы жанып, көш бастады. «Бірінші жедел мақсаттағы» рота екінші нәтиже көрсетсе, «Жа­уын­гер­ді қамтамасыз ету» ротасы үшінші орын иеленді.

«Әскери бөлімдегі әдеби күн» кездесуі редакция ұжымы мен бөлім сарбаздарының ән-жыр шашуына ұласты. Әдеби кешті журналдың жауапты хатшысы, Ұлттық Ұлан сарбазы, қатардағы жауынгер Еламан Қабділәшім жүргізді. Кеш шымыл­ды­ғын журналдың Бас редакторы Асыл Әбіш ана жайлы әнмен түрді. Жыр кешін журналдың әдеби қызметкерлері Алтын Айтқалиева мен Әйгерім Солтан Отан туралы, Ана туралы өлеңдермен жалғады.

Кездесудің қонағы, айтыскер ақын, Ұлттық Ұлан сарбазы, Қарағанды қаласындағы 6505 әскери бөлімінде мер­зімді әскери қызметін өтеген қатар­дағы жауынгер Қуандық Башой сарбаздарға арнау жырын жолдады.

Ал «Құсқанат-ғұмыр» әдеби бірлестігінің мүшелері Әбілхан Марат Әбілхан, Есенкелді Жәнібек, Әйгерім Мүлікқызы, Кербез Қабытаева, Дана Сабырбай жа­уынгерлерге лирикалық жырларын тарту етті.

Кезек бөлім сарбаздарына жеткенде, олар да аянып қалмады. Сайдың серке тасындай қатар тізіліп, сапта тұрған сайыпқырандардың сапында өнерді серік еткендер аз емес екен. Кезек-кезек сахнаға көтеріліп, бірі домбырамен, бірі гитарамен ән салды, бірі жыр оқыды. Кездесуге белсенді араласқан жауынгерлер Алмаз Нұрмұханбет, Арна Ризабек, Әлішер Керімқұл, Ербол Сейітқазы, Ерлан Сатыпалды қарулас қатарластарының құрметіне бөленді.

Кеш Жүсіпбек Аймауытовтың «Алаш әскерінің маршы» өлеңімен түйінделді. «Әскери бөлімдегі әдеби күн» кездеуіне атсалысқан азаматтарға Ertis Media ЖШС-нің директоры Аида Хамзинаның атынан Алғыс хаттар табысталды.

 – Қазақстан Республикасы Ұлттық Ұланы 5512 әскери бөлімінің коман­дирі Аян Әскербекұлына, кездесуді ұйымдастыруға қолұшын созған бөлім қызметкері, әскери клубтың басшысы, аға лейтенант Елдос Қабдра­шитовқа, спорттық сайыс­тарды өткізуге атсалысқан, аға лейтенант Мәди Нигматуллинге және іс-шарада музыкалық аппаратурамен қамтамасыз еткен, Shanyraq облыстық халық шығармашылығы және мәдени-сауық қызметі орталығының басшысы Жарқынбек Амантайұлына алғыс білдіреміз! Жас ұрпақты әскери өмірге бейімдеп, елінің нағыз патриоты болуға тәрбиелеу жолында әр азамат еңбек етуі қажет. Бұл мақсатта сіз бен біздің арқалар жүгіміз ауыр, атқарар ісіміз орасан. Осынау міндетті орындау барысында орнаған ынтымақтастық өз жемісін береді деген сенімдемін, – деді журналдың Бас редакторы Асыл Әбіш.

Әдеби-патриоттық шара әскери бөлімнің музейіне, кітапханасына және сарбаздардың үй-жайына саяхат жасаумен аяқталды.

Павлодар облысы