Қаза тапқандар көп

БҰҰ-ның Адам құқықтары жөніндегі басқармасының мәлі­меттеріне сәйкес 24 ақпаннан бері Украинада 3 974 бейбіт тұр­ғын қаза тапқан. Мерт болған­дардың 259-ы – балалар. Қайтыс болғандардың жартысынан көбі Донецк және Луганск облыс­тарына тиесілі. Сондай-ақ 2 106 адам Киевке таяу маңдағы аумақ­­та бақиға аттанған.

Соғыс басталғалы қаза тап­қан­дар саны бұдан әлде­­қайда көп болуы мүмкін. Мұны ұйым өкіл­дері де мойын­дап отыр. Өйткені БҰҰ Адам құқық­тары жөнінде­гі басқармасы тексерілген нақ­ты ақпараттарға ғана сүйенеді. Украина билігінің пайымдауынша, Маруиполь қаласының өзінде ғана 20 мың бейбіт тұрғын опат болған.

BBC арнасының хабарла­уын­ша, Ресей әскері Луганск облы­сының Украина бақылауындағы бөлігінің әкімшілік орталығы Севе­родонецкіге шабуылдауға кіріс­кен. Қазіргі таңда қала жар­­ты­лай қоршалған. Оны Украи­на­ның басқа бөлігімен бай­ланыс­ты­ратын негізгі күре жол­ға Ресей артил­лерия оғын жаудырып жатыр.

Луганск облыстық әкімші­лігінің басшысы Сергей Гайдай Северодонецкіні Ресей әскер­ле­рі мен ұшақтары жаппай атқы­лап, бомбалап жатқанын мәлім­деді. «Тәулік бойы қиратып жа­тыр. Ұшақтардан бомбалар тас­тайды, «Град», «Смерч» пен артилле­рия­мен атқылайды», дейді ол.

Түрлі ақпарат құралдарының хабарлауынша, Ресей әскері Севе­­родонецкіге үш жақтан ша­буыл­ға шыққан. Енді бір мәлі­мет­те қала маңында ұрыс жүріп жат­қаны айтылған. Гайдайдың айтуынша, ресейлік әскер минометпен атқылауға мүмкіндік беретін қа­шық­тыққа дейін жақындаған.

Еуропалық одақ, АҚШ және Ұлыбритания тарапы Ре­сей­дің қыл­мыстық әреке­тін жауап­кер­шілікке тарту әрекеттерін үйлес­тіретін Қауіпсіздік қыл­мыс­тары бойынша консульта­тивтік топ құ­ра­тынын хабарлады. Оның негізгі миссиясына Украина Бас прокуратурасына көмектесіп, Ресей әскерлерінің қылмыстарын жинақтау, сақтау және талдауға жәрдесу кірмек. Консультативтік топқа кіретін сарапшылардың көп­шілігі қауіп­сіздік мақсатында Польшада орналасады.

«Ресейдің Украинадағы не­гіз­сіз әскери агрессиясы кезін­де жасалған жантүршігерлік зұ­­лымдық жасағанның бәрін жа­уапқа тартуды қамтамасыз ету өте маңызды. Әскери қыл­мыс­тар жазасыз қалмайды», деді Еуро­палық одақ дипломаты Жозеп Боррел.

Ұлыбритания Сыртқы істер министрі Лиз Трасс Ресей пре­зи­дентін «тыныштандыру» әре­­кетін қауіпті деп санайтынын жеткізді. Сондай-ақ ол Украи­­наға қару-жарақ жеткізуді көбей­­туді және Ресейге қарсы санк­ция­­ларды күшейтуді сұрап отыр.

«Ресей агрессиясын басу мүм­кін емес. Оған күшпен қарсы тұру керек. Біз әскери көмек пен санкция арқылы Украинаның жеңісін қамтамасыз етуде табанды болуымыз керек. Біз енді тоқтай алмаймыз», деді Лиз Трасс.

Таяуда Давоста өткен форумда бірқатар мемлекет қайраткері Украинадағы соғысты тоқтату үшін Киев билігі Ресейдің айт­қанына көнуі қажет дегендей пікір білдірді. Атап айтқанда, АҚШ-тың мемлекеттік хатшысы қызметін атқарған Генри Киссинджер Украинаны соғысқа дейінгі территорияны ғана қайтарып, бейбіт келісімге қол қоюға шақырды.

Алайда оның пікірі Украина билігіне ұнаған жоқ. Ел пре­зиденті Володимир Зеленский Украина аумағының бір бөлігін Ресейге беру туралы ұсынысты сынға алды.

«Ресей қандай әрекетке бар­­са да, «олардың мүддесін еске­рейік» дейтін біреу шы­ғады. Биыл Давоста мұн­дай пікірді тағы естідік. Ресей­дің мыңдаған зымы­раны Украи­наны қиратқанына қара­мастан. Он мыңдаған украин өлті­рілгеніне қарамастан. Буча мен Мариупольге қара­мас­тан. Қираған қалаларға қара­мастан. Ресейдің адамдарды конве­йер­дегідей өлтіріп, азаптап, зор­лап, қорлайтын «тәрбиелеу лагерь­леріне» қарамастан», деп кейіді Володимир Зеленский.

Кей сарапшылар Ресей сар­баздарының Донбаста алға жылжуына қарамастан, әскерінің әле­уеті әлсіреп бара жатқанын алға тартады. Бұған негіз же­тер­­лік. Таяуда әлеуметтік желі­де Т-62 танкілері тиелген эше­лон­ның Украинаға қарай кетіп бара жат­қаны бейнеленген видео тарады. Кейінірек сол эшелон Мели­­то­поль қаласына барып жеткен. Айта кетерлігі, Т-62 тан­кілері Кеңес Одағы ке­зінде қол­даныста бол­ғанымен, ке­йін­нен ескіргеніне байланыс­ты сап­тан шығарылған. Сарап­шы­лар Мәскеу тарапының қой­ма­дағы көне танкілерді шыға­руын әскердегі техниканың көп­теп қи­ра­уымен байланыстырып отыр.