Қарулы Күштерде Кеңес Одағының Батыры, Халық қаһарманы, тәуелсіз Қазақстанның алғашқы Қорғаныс министрі, армия генералы Сағадат Нұрмағамбетовті еске алу іс-шаралары өтті.
Аты аңызға айналған қолбасшының туған жері Ақкөл қаласында өткен еске алу іс-шарасына Қарулы Күштердің ардагері Халық қаһарманы, отставкадағы генерал-лейтенант Бақытжан Ертаев, Бас штаб бастығының орынбасары – Тәрбие және идеологиялық жұмыстар департаментінің басшысы, генерал-майор Серік Борамбаев, аудан әкімі Юрий Курушин, сондай-ақ батырдың немересі – запастағы подполковник Келден Нұрмағамбетов қатысты. Қазақтың даңқты қолбасшысын еске алуға Қарулы Күштердің әскери қызметшілері мен ардагерлері, әскери колледждің, «Жас сарбаз» республикалық әскери-патриоттық қозғалысының, мамандандырылған сыныптардың тәрбиеленушілері, қоғам мен жергілікті атқарушы органдардың өкілдері келді.
– Сағадат Қожахметұлы Нұрмағамбетов Отанын сүйген, өз ісінің нағыз маманы, әскери борышқа адал тұлғаның үлгісі ретінде жадымызда мәңгі сақталады. Ол Қазақстанның тәуелсіздігі мен қауіпсіздігінің кепілі – Қарулы Күштердің қалыптасуына орасан зор үлес қосты. Армия генералы Сағадат Нұрмағамбетовтің есімі тәуелсіз Қазақстан тарихына алтын әріптермен жазылды, – деді генерал-майор Серік Борамбаев.
Іс-шара соңында Ақкөл қаласындағы алаңда Қарулы Күштердің Ұлттық әскери-патриоттық орталығы Орталық әскери оркестрінің концерті өтті.
Батырдың ескерткіштеріне гүл шоқтарын қою бірқатар гарнизонда, оның ішінде Алматыдағы Құрлық әскерлерінің әскери институтында, астанадағы әскери колледжде, сондай-ақ Гвардейск гарнизонындағы «Сағадат саябағында» өтті.