Қай елде болмасын қарулы күштердің маңызы зор, мемлекет те алдымен осы салаға басымдық береді. Әсіресе елдегі десанттық-шабуылдау әскерлерінің қызметі ерекше. Биыл аталған әскердің құрылғанына – 22 жыл толып отыр.
2000 жылдың 6 шілдесінде Мемлекет басшысының Жарлығымен Қазақстан Республикасының Қарулы Күштерінде Ұтқыр күштер құрылды. Олар кейіннен Аэроұтқыр әскерлер болып өзгерді. Ал 2017 жылы заман талабына сай Десанттық-шабуылдау әскерлері деген атау иеленді. Қазіргі уақытта десанттық-шабуылдаушы әскерлер жоғары мобильді және соңғы үлгідегі техникамен жабдықталған, негізгі күштерден, оның ішінде жау тылында басқа да тапсырмаларды өз бетінше орындауға қабілетті. Олардың жауынгерлік қуатын десанттық-шабуылдау, артиллериялық, барлау, бітімгерлік құрамалары, бөлімдер мен бөлімшелер құрайды.
Десанттық-шабуылдау әскерлері барлық оқу-жаттығуларға, соның ішінде халықаралық жаттығуларға ұдайы қатысып жүр. Атап айтқанда, олар Армия халықаралық ойындарында нәтижелі өнер көрсетті. Десантшы-жауынгерлер әрдайым өздерінің жоғары дайындық деңгейін, кәсіби шеберліктерін, аса күрделі тапсырмаларды орындауға қабілеттілігін көрсетіп келеді.
Әуе-десанты дайындығы – әскердегі маңызды мәселе. Көк тарландары күндіз де, түнде де, тіпті күрделі метеорологиялық жағдайларда да парашютпен сенімді түрде секіреді. Бітімгерлік қызмет атқаруда да десанттық-шабуылдау әскерлерінің қосқан үлесі зор. «Қазполк» әскери қызметшілері 2003-2008 жылдар аралығында Ирактағы бітімгерлік миссияға қатысты. 2018 жылдан бастап «Қазполк» және «Тілендиев» бітімгерлік дайындық орталығы базасында қазақстандық бітімгерлер шеберлігін шыңдап келеді.
Десанттық-шабуылдау әскерлерінде қызмет ету қашанда абыройлы міндет саналады. Бөлімдер мен бөлімшелерді жасақтауға қатаң іріктеу жүргізіледі. Мұнда Отан алдындағы борышын өтеуге келген мерзімді әскери қызметшілер тер төгеді. Әдетте, олардың спорттық разрядтары бар және психологиялық тұрақтылық деңгейі жоғары. «Десантшылар – қандай тапсырмаларды орындаса да, анық әрі шебер іс-қимыл жасап, батылдық пен ептілік көрсететін, шыдамдылығы мен жауынгерлік машығы мықты, кез келген сәтте егемен Қазақстанды қорғауға әзір нағыз жауынгерлер», дейді Қорғаныс министрлігінің өкілдері.