Еуропадағы аптап ыстық салдарынан өрт көбейді. Қазір мыңдаған өрт сөндіруші Португалия, Испания және Францияның оңтүстік-батысында орманда тілсіз жаумен күресіп жатыр.
ВВС басылымының хабарлауынша Францияның Жирон аймағында өрттің кесірінен 12 мыңнан астам адам эвакуацияланған. Испанияның оңтүстігінде, Коста-дель-Сольге жақын жерде 2300-ге жуық адам Михас төбелеріне тараған орман өртінен қашуға мәжбүр болған. Жергілікті тұрғындар мұндай орман өрттерін бұрын-соңды көрмегенін айтады. Францияның оңтүстік батысындағы және Бордоның оңтүстігіндегі өрт 10 000 гектарға жуық аумақты шарпыған. Өртті ауыздықтауға 3 мыңға жуық өрт сөндіруші жұмылдырылды.
Португалияның Порту қаласының солтүстік-шығысының 30 000 га жері жалынға оранған. Тілсіз жаудан Жерорта теңізінің өзге бөліктері де зардап шеккен көрінеді. Италия үкіметі құрғақшылық жайлаған По алқабында төтенше жағдай жариялады. Қазірде елдің ең ұзын өзенінің көп бөлігі кішкене көлшікке айналған. Грекияда өрт сөндірушілер Афинадан оңтүстік-шығысқа қарай 50 шақырымдай жердегі Фериза аймағында және Криттің солтүстік жағалауындағы Ретимнон маңындағы өртті лезде сөндіріп үлгерді. Ретимнонға жақын жерде жеті ауыл эвакуацияланған.
Сондай-ақ Марокконың солтүстігінде Лараче, Уэцзан, Таза және Тетуан провинцияларын шарпыған өртке байланысты бірнеше ауыл тұрғындары қауіпсіз жерге көшірілді. Ксар эль-Кебир аймағында бір ауыл толығымен жойылып кеткен. Француз өрт сөндірушілер федерациясының басшысы Грегори Аллионе мұның бәрі жаһандық жылынудың салдары деп есептейді. Мамандар климаттың антропогендік өзгеруіне байланысты аптап ыстық жиілеп кеткенін айтады. Өнеркәсіп дәуірі басталғаннан бері атмосфера шамамен 1,1°C-ге жылыған. Егер әлем көміртегі шығарындыларын қысқартпаса, температура көтеріле береді.