«Самара-Шымкент» трассасында жол апатынан 5 адам қаза болды, оның арасында 2 бала бар, деп хабарлайды Egemen.kz.
Жол апаты бүгін түнгі сағат үш шамасында Жалағаш ауданына қарасты Таң ауылы тұсындағы «Самара-Шымкент» автожолының бойында болған.
«Оқиға орнында 27 жастағы азаматтың басқаруындағы «Toyota Camry» және 42 жастағы азаматтың басқаруындағы «Daewoo-Nexia» жеңіл автокөліктері соқтығысқан. Салдарынан екі жүргізуші, «Daewoo-Nexia» көлігіндегі Түркістан облысы Ордабасы ауданында тұратын 42 жастағы жолаушы, 6, 10 жастағы екі бала көз жұмды», деп мәлім етті Қызылорда облыстық Төтенше жағдайлар департаментінен.
Ведомство мәліметінше, оқиға орнында Төтенше жағдайлар департаменті, «Жосалы» күрежол медициналық бекеті, жедел жәрдем бригадасы, аудандық полиция бөлімінен келген мамандар тиісті жұмыстар атқарған.
«Аталған дерек бойынша ҚР Қылмыстық кодексінің 345-бабы 4-бөлігімен (Көлік құралдарын басқаратын адамдардың жол жүрісі немесе көлік құралдарын пайдалану қағидаларын бұзуы) сотқа дейінгі тергеп-тексеру басталды. Тиісті сараптамалар тағайындалды. Оқиғаның мән-жайы анықталып жатыр», деді Қызылорда облыстық Полиция департаментінен.