Эпидемиялық ахуалға бейжай қарамау керек

Елордадан басқа өңірлердегі ахуал тұрақты

Денсаулық сақтау министрі Ажар Ғи­ният өз баяндамасында әлемде коронавирус инфекциясымен сырқаттанушылықтың өсуі жалғасып жатқанын және зерттелген үлгілердің 95%-ын құрайтын «Омик­рон» штамы басым нұсқа болып қалып отыр­ғанын атап өтті. 20 маусымнан бастап республика бойынша КВИ-мен сырқат­танушылық арта бастады. Соңғы екі ап­тада ауырған адамдар саны 3,2 есеге өсті – 10 714-тен 34 550 жағдайға дейін. Ми­нистрдің айтуынша, ауырған адамдардың 80%-ы егілмеген адамдар немесе 6 ай бұрын егілген адамдар екенін ескерсек, уақтылы КВИ-ге қарсы ревакциналаумен қамту қажет екенін көрсетеді. Бүгінде ревакциналауды 5 млн-нан астам адам алды, бұл тиісті контингенттің 68%-ын құрайды.

Ресми статистикаға сәйкес елімізде пандемия басталғаннан бері коронавирус инфекциясымен 1 млн 400 мыңнан астам адам ауырып, аурудың 5 толқыны болды. 20 маусымнан бастап республика бойынша КВИ-мен сырқаттану арта бастады. «Соң­ғы екі аптада ауырған адамдардың саны 3,2 есеге өсті. Өткен тәулікте КВИ-дің оң нә­тижесімен 2 021 жағдай, КВИ-дің теріс нәти­жесімен 1 жағдай тіркелді, өлім-жітім тір­келген жоқ», деді Денсаулық сақтау министрі.

Эпидемиялық жағдайды бағалау үшін Омикрон нұсқасының сипаттарын, денсаулық сақтау жүйесіне жүктемені және саланың дайындығын ескере отырып, Денсаулық сақтау министрлігі 2022 жылғы 15 шілдеден бастап сырқат­та­нушылық көрсеткішін 100 мың тұрғынға шаққандағы ауруханаға жатқызу көр­сеткішіне ауыстыра отырып, ағымдағы матрицаны өзектендірді. Ведомство басшысының айтуынша, бағалау матрицасына сәйкес Нұр-Сұлтан қаласы – сары аймақта, Қазақстан Республикасы және қалған өңірлер жасыл аймақта тұр.

Қазақстан Республикасында коронавирус инфекциясымен сырқаттанудың өсуі маусым айының ортасынан бастап тіркелуде, аурудың ең көп өсуі еліміздің 6 өңірінде байқалады, онда соңғы екі аптада сырқаттанушылық 5 есе және одан жоғары өсті, оның ішінде Ақтөбе облысында – 8,2 есе, Батыс Қазақстан облысында – 6,7 есе, Қарағанды облысында – 6,4 есе, Павлодар облысында – 6,3 есе, Ақмола облысында – 6,1 есе, Қостанай облысында – 5 есе көтеріліп отыр.

Ажар Ғинияттың айтуынша, сыр­қат­тану 3-тен 5 есеге дейін өскен өңірлердің екінші тобына республиканың 5 өңірі енді. Сырқаттанудың 3 есеге дейін өсуі еліміздің 6 өңірінде байқалады. Соңғы аптада Алматы қаласында КВИ бойын­ша эпидемиялық ахуал тұрақтанды. «Бү­кіл әлемдегідей Омикрон ВА.5 шта­мы­ның нұсқасы тудырған COVID-19-дың кезекті толқыны осы жылғы шілдеде елімізде жүргізілген генетикалық зерттеу нәтижелері бойынша зерттелген үлгілердің 70%-да анықталды. Бұл нұсқа жо­ғары жұқпалығымен сипатталады және Дельта нұсқасымен салыстырғанда ауру әлде­қайда жеңіл өтеді. Бұл науқастардың 94%-дан астамы амбулаториялық жағ­дайда емделетінімен де расталып отыр», деді А.Ғиният.

Стационарлық ем қабылдайтын па­циенттерді талдау кезінде 36%-ы 18 жасқа дейінгі балалар, 64%-ы ересектер екені, ал ауырған барлық адамдардың 52%-да қосалқы созылмалы аурулары бар екені анықталды. «Өткен жылмен са­лыстырғанда КВИ-ге күдікті жедел меди­циналық көмекке шақырулар саны 3,7 есеге азайғанын атап айтқым келеді. Бұл көрсеткіш те аурудың жеңіл түрде өтіп жатқанын айқындайды», деді Денсаулық сақтау министрі.

Бүгінде инфекциялық төсектік орын­мен қамту 30%-ды немесе науқастар саны 1 500, реанимациялық төсектік орынмен қамту 7%-ды немесе науқастар саны 47-ні құрайды. Ведомство басшысы төсектік орын қорының қозғалысын бақылау онлайн режімде жүргізілетінін атап өтті. «Төсектік орынмен қамтылуды қадағалау үшін интерактивті карта онлайн режімде өңірлер бойынша меди­ци­налық ұйымдар деңгейіне дейін ахуалды бағалауға және жедел ден қою шарала­рын қабылдауға мүмкіндік береді. Бұл әкім­діктерге, ден­саулық сақтау басқар­ма­­лар­ына қолже­тиімді және күнделікті шешім қабылдауға ыңғайлы», деді А.Ғиният.

Шектеу шаралары инфекцияны оқшаулауға бағытталады

Денсаулық сақтау министрлігі коронавирус инфекциясының таралуына жол бермеу және тұрақты негізде уақтылы эпидемияға қарсы шаралар қабылдау мақсатында өңірлермен ахуалды бағалау бойынша штабтар өткізіп, жағдайды тұрақтандыруға бағытталған шараларды қабылдауда. Сонымен қатар халықты ақпараттандыру мақсатында брифингтер, бұқаралық ақпарат құралдарында, оның ішінде медицина саласындағы жетекші сарапшылардың қатысуымен кездесулер де өткізіледі. «КВИ медициналық ұйым­дардың дайындығы тұрақты негізде қам­тамасыз етілуде, бүгінде 189 медициналық ұйымда 5 мыңнан астам ковидтік төсектік орын, 620 реанимациялық төсектік орын, резервте 20 мыңнан астам төсектік орын бар. БМСК деңгейінде 5 700 ұйым және 2 400-ге жуық көшпелі мобильді бригада, оның 1 мыңнан астамы ауылда меди­­ци­налық көмек көрсетуде. Резервте 1 610 мо­бильді бригада бар», деп атап өтті ми­нистр.

Ведомство басшысының хабар­лау­ын­ша, ауырған адамдардың 80%-ы егілмеген адамдар немесе 6 ай бұрын егілген адамдар екенін ескерсек, уақтылы КВИ-ға қар­сы ревакциналаумен қамту қажет еке­нін көрсетеді.

А.Ғиният республикада ревакциналау одан әрі жалғасып жатқанын айтты. Бү­гінде ревакциналауды 5 млн-нан астам адам алды, бұл тиісті контингенттің 68%-ын құрайды.

Сонымен қатар коронавирус инфек­циясының өсуіне байланысты, эпи­де­миялық жағдайды бағалау матрица­сының өзектенуін ескере отырып, Ден­саулық сақтау министрлігі аймақтар бойын­ша шектеу шараларын қайта қарады және бұл шараларды Ведомствоаралық комиссия мақұлдады. Мәселен, жасыл және сары аймақтарда шектеу шаралары бизнес объектілерінің қызметін шектемей, инфекция көзін оқшаулауға бағытталған. Яғни объектілерде санитарлық-дезин­фек­циялық тәртіпті күшейту, қоғамдық орындарда, қоғамдық көлікте медициналық маска тағу ұсынылады. Қызыл аймақта шектеу шаралары денсаулық сақтау жүйесінің жүктемесіне байланысты екі кезеңмен қабылданады. Бірінші кезеңде – R>1 болғанда және 100 мың тұрғынға шаққанда ауруханаға жатқызу көрсеткіші 25,0-ден 50,0-ге дейін болған кезде: бизнес шектеусіз жұмыс істейді, жабық үй-жайларда, көліктің барлық түрінде міндетті түрде маскалар пайдаланылады.

Екінші кезеңде R-ға қарамастан, 100 мың тұрғынға шаққанда ауруханаға жатқызу көрсеткіші 50,0-ден астам бол­ған кезде: объектілерде «Ashyq» қосым­шасы міндетті түрде пайдаланылады, көп­шілік іс-шараларды өткізуге байланыс­ты бизнес объектілерінің толымдылығы 50%-ға дейін шектеледі, білім беру ұйым­дарына қосымша шектеулер енгізіледі, ұйымдар қызметкерлерінің 30%-ы қа­шықтықтан жұмыс істеуге ауысады. Қызыл аймаққа көшу  және шектеу шара­ларын енгізу бизнестің және халықтың про­фи­лактикалық шараларды ұстану жағ­дайына байланысты болады.

Денсаулық сақтау министрінің айтуынша, сары аймақтағы Нұр-Сұлтан қаласында үй-жайларда көп адам қаты­сатын көпшілік іс-шаралар өткізіледі және медициналық маска тағу, әлеуметтік қа­шықтық талаптары сақталмайды. Бұл елордада инфекцияның одан әрі таралуына алып келіп отыр. «Эпидемиялық ахуалды тұрақтандыру және бизнестің шектеусіз жұмыс істеуін қамтамасыз ету үшін бизнес объектілерде санитарлық-дезинфекция режімін сақтау және халық­тың қызметтер алу кезіндегі қауіпсіздігін сақтау қажеттілігі туралы тағы да қайта еске саламыз», деп түйіндеді А.Ғиният.

Мәселені қорытындылаған Премьер-Министр Әлихан Смайылов жалпы коронавирус инфекциясын жұқтырудың көбейгені, әсіресе Нұр-Сұлтан қаласында және Қарағанды облысында байқалып отырғанын атап өтті.

«Күн сайын республика бойынша 3 мыңға дейін жағдай тіркеледі. Бұл – жоғары көрсеткіш. Сондықтан, Коро­на­вирустың таралуына жол бермеу жөніндегі ведомствоаралық комиссия шектеу шараларын күшейтті, олар өңірлермен және «Атамекен» палатасымен алдын ала келісілді», деді Ә.Смайылов.

Үкімет басшысы Денсаулық сақтау министрлігі эпидемиологиялық жағдайға тұрақты мониторинг жүргізіп, шектеу шараларының сақталуын қамтамасыз етуі тиіс екенін айтты.

«Маска тағу, әлеуметтік қашықтықты сақтау сияқты алдын алудың негізгі шаралары қатаң сақталуы керек. Вакциналау мен ревакциналаудың төмен қарқыны эпидемиялық жағдайдың күрт нашарлап кетуіне алып келеді. Сондықтан әкімдіктерге халықты вакциналау және ревакциналау жұмыстарын жандандыруды тапсырамын», деп түйіндеді Премьер-Министр.

«Қуатты өңірлер – ел дамуының драйвері» ұлттық жобасы

Үкімет отырысында «Қуатты өңірлер – ел дамуының драйвері» ұлттық жобасын іске асыру барысы қаралды.

Ұлттық экономика министрі Әлібек Қуантыров Ұлттық жобаның мақсаты тұр­ғындардың базалық қызметтерге тең қол­жетімділігін қамтамасыз ету, тұрғын үй-ком­муналдық жағдайды әрі көлік бай­­ланысын жақсарту, сондай-ақ елдің тран­зиттік әлеуетін және халықтың мобиль­ділігін арттыру екенін атап өтті.

Ұлттық жобаны 2021 жылы іске асы­рудың нәтижесінде тұрғындарды ауыз сумен қамтамасыз ету көрсеткіші 96%-ды құрады (қалаларда – 98%, ауыл­дарда – 93%), моно және шағын қала­ларда ин­женерлік және көлік инфра­құ­ры­лымы­ның тозуы 57,6%-дан 45,5%-ға дейін тө­мен­деді, 17,1 млн шаршы метр тұрғын үй пайдалануға берілді, нормативтік жай-күйдегі республикалық маңызы бар жол­дардың үлесі 90%-ға дейін (жергілікті маңы­зы бар жолдардың үлесі 80%-ға дейін) өсті, сондай-ақ 112 мыңға жуық тұрақ­ты және уақытша жұмыс орындары құрылды.

Биыл Ұлттық жобаның іс-шараларын орындау жалғасуда. Атап айтқанда, 576 ауылда жобаларды іске асыруға, моно және шағын қалалардың инфрақұрылымын дамытуға және жас мамандарға тұрғын үй сатып алуға қаражат бөлінді.

Сонымен қатар Индустрия және инфра­құрылымдық даму министрі Қайыр­бек Өскенбаев, Еңбек және халықты әлеу­меттік қорғау министрі Тамара Дүйсе­нова, Қарағанды облысының әкімі Жеңіс Қасымбек, Солтүстік Қазақстан облы­сының әкімі Құмар Ақсақалов және Батыс Қазақстан облысы әкімінің орынбасары Бақытжан Нарымбетов баяндама жасады.

Баяндамашыларды тыңдап болғаннан кейін Премьер-Министр Ұлттық жобаны іске асырудың елді мекендердегі инфрақұрылымның жай-күйін жақсартуға, 480 тірек және серіктес ауылды жаң­ғыр­туға, тұрғын үй құрылысына 2,4 трлн теңге инвестиция тартуға мүмкіндік беріл­генін айтты. Жұмыс істейтін жастарға, халықтың әлеуметтік тұрғыдан осал топтарына, көпбалалы отбасыларға арналған тұрғын үй құрылысы жүріп жатыр.

Сонымен қатар Үкімет басшысы мем­лекеттік органдар мен әкімдіктердің назарын «Дипломмен – ауылға!» жобасы бо­йынша бюджеттік кредиттер беру жө­ніндегі кейбір көрсеткіштердің орындал­мағанына аударды.

«Жыл соңына дейін көп уақыт қалған жоқ, сондықтан осы жұмысты жандан­дыру қажет. Жобалардың іске асырылуы әкімдер мен жауапты орталық мем­ле­кет­тік органдар басшыларының ерекше ба­қылауында болуға тиіс», деді Ә.Смайы­лов.

Сондай-ақ Премьер-Министр 1 қа­занға дейін Ауылдық аумақтарды дамы­ту тұжырымдамасының жобасын әзір­леуді және Ұлттық жобаның индикатор­ларына сәйкес қоныс аударушыларды қабылдауды, орналастыруды және қол­дауды қамтамасыз етуді тапсырды.

Судағы қауіпсіздік шараларын күшейту қажет

Үкімет отырысы барысында Премьер-Министр судағы қауіпсіздікті арттыру бойынша шаралар қабылдауды тапсырды. Ол қазір шомылу маусымының қызған шағы екенін, бұл орайда судағы қауіпсіздік шараларын сақтамаудың көп жағдайда қайғылы оқиғаларға әкелетінін айтып өтті.

1 маусымнан бері елімізде 140 адам суға кеткен, оның 49-ы – балалар. Өткен жылмен салыстырғанда адамдардың суға батуы 42%-ға қысқарған. Премьер-Министрдің ойынша, сонда да бұл көр­сеткіш өте жоғары.

«Ел азаматтары балалар қауіпсіздігіне сақ болуы қажет. Қайғылы жағдайларға жол бермеу үшін барлық шараларды қабылдауымыз керек», деді Ә.Смайылов.

Осыған орай Үкімет басшысы Төтен­ше жағдайлар, Экология, геология және табиғи ресурстар министрліктеріне әкім­дік­термен бірлесіп судағы қауіпсіздік шараларын күшейтуді, онда құтқарушылардың болуын бақылауды жүктеді. Сондай-ақ халық арасында түсіндіру жұмыстарын кеңінен жүргізіп, суға түсуге болмайтын жерлерді анық белгілеуді тапсырды.