Бауырластардың бірлігі бекем

Алдымен бауырлас халықтардың өкілдері Ертіс жағалауына барып, татар халқының көрнекті ақыны Ғабдолла Тоқайдың бюстіне гүл шоқтарын қойды. Сонымен қатар ұлы Абайдың ескерткішіне аялдап, хакімнің рухына тағзым етті.

Сабантойға орай Бейбітшілік аралында екі жақтың бастамасымен шағын этноауыл салынғанын айта кеткен орынды. Мұнда Татарстан Республикасының Ақтаныш ауданының қолдауымен ұлттық бұйымдармен безендірілген этноүй, диірмен, көне монша орналастырылып, мерекенің сәнін келтірді. Жиналған халық алып самаурыннан шай ішіп, татар халқының ұлттық тағамдарынан дәм татуға мүмкіндік алды.

Абай облысының әкімі Нұрлан Ұран­хаев және Татарстан Республи­ка­сы­ның Мемлекеттік Кеңесінің төрағасы Фарид Мұхаметшин шырша көшеттерін егіп, туыс халықтардың мәдени байланысынан бөлек, екіжақты алыс-беріс пен барыс-ке­ліс­ті құнттаудың тиімді жолдарын талқылады.

«Семей қаласында Сабантойды өткі­зудің жақсы дәстүрі қалыптасқан. Биылғы мерекенің ерекшелігі сол, ол жаңадан құ­рыл­ған Абай облысында алғаш рет кең ау­қымды деңгейде өткізіліп отыр. Дос­тық, бауырластық байланыстарымыз эко­номикалық ынтымақтастыққа ұласады деген үміттеміз. Айталық, біз үшін Қа­зандағы абаттандыру тәжірибесі өте қы­зықты. Осы бағытта жұмыс істеуге ниеттіміз», деді Н.Ұранхаев.

Өз кезегінде Татарстан Респуб­ли­ка­сының Мемлекеттік Кеңесінің төрағасы бауырлас ұлттардың бейбітшілік пен келісімде өмір сүріп жатқаны қуантатынын жеткізді. «Біз үшін Қазақстанның Пре­зи­денті Қасым-Жомарт Тоқаевтың Қазан­ға келген кездегі қол жеткізген уағда­лас­тықтарды бекітіп, сақтау өте маңызды», деді Ф.Мұхаметшин.

Аталған мерекеге байланысты Семейде татар өнер мектебінің жаңа ғимараты пайдалануға берілгенін айта кету керек. Бұл екіжақты ынтымақтастықтың тағы бір жемісі дейді көршілес елдің өкілдері. Өнер мектебінің талантты оқушылары келген меймандарға мерекелік концерт ұсынды.

Облыс орталығында өткен Сабантой музыкалық бағдарламамен, түрлі ойын конкурстарымен, сондай-ақ спорттық жарыстармен жалғасты.

Абай облысы