Футболдан УЕФА Чемпиондар лигасының үшінші тур ойындары аяқталды. Жарыстың екінші күнінде кейінгі төрт топтың командалары бақ сынады.
Алғашқы екі турдан кейін «Е» тобында көш бастап тұрған «Милан» сырт алаңда ойнап, Лондонда «Челсиден» ірі есеппен жеңіліп қалды – 3:0.
Топтағы екінші матчта «Зальцбург» өз алаңында Загребтің «Динамосын» қабылдап, 1:0 есебімен басым түсті. «F» тобының үздігі «Реал» Мадридте «Шахтер» (Донецк) қақпасына 35 соққы жасап, екі-ақ гол енгізді – 2:1. Германияның «Лейпцигі» өз алаңында «Селтикті» 3:1 есебімен тізе бүктірді.
«G» тобында «Манчестер Сити» Англияда «Копенгагенді» (5:0), «Боруссия» Испанияда «Севильяны» (4:1) ірі есеппен жеңді. «Н» тобында «Ювентус» «Маккабиді» 3:1 есебімен жеңіп, алғашқы ұпайын олжаласа, ПСЖ сырт алаңда «Бенфикамен» тең түсті – 1:1. ПСЖ сапынан Лионель Месси мергендігімен көзге түсті.