Қаржы министрі Ерұлан Жамаубаев Үкімет отырысында биылғы тоғыз айда республикалық бюджеттен 12,9 триллион теңге жұмсалғанын айтты, деп хабарлайды Egemen.kz.
«Мемлекеттік бюджет шығысы – 96,2%-ға, республикалық – 96,3%-ға, жергілікті бюджеттер – 97,9%-ға атқарылды. Республикалық бюджет бойынша 12,9 триллион теңгеге шығыс жүргізілді. Атқарылмаған бюджет қаражаты 494 млрд теңгені құрады, оның 9 млрд теңгесі үнемдеу есебінен болды. Игерілмеген қаржы 485 млрд теңгені құрады», деді Ерұлан Жамаубаев.
Министрдің айтуынша ең көп қаржы игерілмей қалған Оқу-ағарту, Ғылым және жоғары білім, Ішкi iстер, Мәдениет және спорт министрліктерінде.
«Игерілмеудің негізгі себептері: қайта құру процесі, орындалған жұмыстар актілерінің, шот-фактуралардың уақытылы ұсынылмауы, бюджеттік бағдарламаларды іске асыру бойынша нормативтік құқықтық актілердің уақытылы қабылданбауы, нақты көрсетілген қызметтердің көлеміне ақы төлеу», деп түсіндірді министр.