Футболдан Қазақстан ұлттық құрамасы қараша айында Ташкентте Өзбекстан футболшыларымен жолдастық матч өткізеді. Бұл туралы Қазақстан футбол федерациясының баспасөз қызметі хабарлады.
«Өзбекстан құрамасы Еуро-2024 іріктеу кезеңіне дайындық үшін жақсы қарсылас деп санаймын. Жаттықтырушылар штабы үшін көп мәлімет жинауға мүмкіндік береді. Өзбекстанда мықты футболшылар көп. Сол себепті осы ойында Еуропа чемпионатының алдағы іріктеу кезеңінде үміт артатын футболшыларды бір тексеріп аламын деп ойлаймын. Өте қызықты ойын болады деп үміттенемін», дейді Магомед Адиев.
Айта кетейік, Қазақстан мен Өзбекстан құрамалары бұған дейін жасыл алаңда алты рет кездескен. Оның біреуінде жерлестеріміз, екі матчта Өзбекстан футболшылары жеңіске жеткен. Ал үш ойын тең есеппен аяқталған. Қазан айындағы ФИФА рейтингі бойынша Өзбекстан құрамасы 77-орында тұр. Қазақстан 113-орынға жайғасқан. Екі құрама арасындағы жолдастық матч осы жылдың 16 қарашасында Ташкенттегі «Пахтакор» стадионында өтеді деп жоспарланған.