Аралас жекпе-жек әлеміндегі ең беделді – UFC ұйымында өнер көрсететін қазақстандық спортшы Жалғас Жұмағұловтың (14-7) келесі айқасы қашан өтетіні белгілі болды.
UFC кештерінде 5 жекпе-жек өткізіп, тек біреуінде ғана жеңіске жеткен отандасымыз Жалғас Жұмағұлов осы ұйымдағы алтыншы айқасын 19 қарашада америкалық Чарльз Джонсонмен (11-3) өткізетін болды. Бұл туралы UFC-дің әлеуметтік желідегі ресми парақшасы мәлімдеді. Ч.Джонсон ең кейінгі кездесуін Англияда жергілікті спортшы Мухаммад Мокаевпен өткізіп, үш раундтың қорытындысы бойынша төрешілердің бірауыздан шығарған шешімімен жеңіліп қалған еді.
Жұмағұлов пен Джонсон арасындағы кездесу АҚШ-тың Лас-Вегас қаласында орналасқан (Невада штаты) UFC Apex аренасында өтеді деп жоспарланған. Қазақстандық файтер 2020 жылдың шілдесінен бастап америкалық промоушенмен келісімшартқа отырып, осы ұйым аясында жұдырықтасып келеді.