Халықаралық шахмат федерациясы (ФИДЕ) рапид пен блицтен биылғы әлем чемпионаты 25-30 желтоқсан күндері Алматыда өтетінін ресми түрде растады.
Былтыр шахматтың дәл осы түрлері бойынша дүниежүзілік дода Польшаның астанасы – Варшавада ұйымдастырылған еді. Блицтен өткен бәсекеде Бибісара Асаубаева (14 ұпай) бас жүлдені олжалап, барша қазақстандық жанкүйерді қуаныш пен шаттыққа бөледі. Ерлердің тартысы франциялық Максим Вашье-Лагравтың жеңісімен аяқталды. Рапидтен әйелдер арасындағы сайыста ресейлік Александра Костенюк (9,0 ұпай) алтыннан алқа тақты. Одан небәрі 0,5 ұпай қалып қойған Асаубаева күміс медаль иеленді. Ерлердің бәсекесінде өзбекстандық Нодирбек Абдусатторов алдына жан салмады.
Осы жарыста да жерлестеріміз барынша табысты өнер көрсетеді деп үміттенеміз.