Бүгін Талдықорған-Үштөбе тасжолының 5-шақырымында Toyota Windom және Toyota Sienna көліктері соқтығысқан. Жол апатынан екі әйел оқиға орнында көз жұмды, деп хабарлайды Egemen.kz.
Жетісу облыстық полиция департаментінің мәліметінше, көліктердің бірінің жүргізушісі көлікті басқара алмай, қарсы жолаққа шығып кеткен.
«Toyota Windom көлігінің ішінде болған 75 және 34 жастағы екі жолаушы әйел оқиға орнында қаза тапты. Екі жүргізуші мен тағы үш адам Талдықорғандағы ауруханаға жеткізілді», деп хабарлады облыстық полиция департаментінен.
Ведомствода апатқа қатысты қажетті сараптамалар тағайындалып, сотқа дейінгі тергеу жұмыстары басталғанын атап өтті.