Елімізде 49 жекеменшік IT-мектеп Tech Orda бағдарламасы бойынша IT-мамандарды даярлауды бастады. Бұл бағдарлама Президент Қасым-Жомарт Тоқаевтың тапсырмасын орындау мақсатында әзірленген болатын. Дәлірек айтсақ, Мемлекет басшысы 2025 жылға қарай кемінде 100 мың IT-маман даярлау міндетін жүктеген еді.
– Президент айтқан 100 мың ІТ-маманның 20 мыңы Цифрлық даму, инновациялар және аэроғарыш өнеркәсібі министрлігінің бастамасымен Astana Hub базасында әзірленген Tech Orda бағдарламасы бойынша оқитын болады. Министр Бағдат Мусин осы бағдарлама аясында білікті кадрлар даярлауға маманданған отандық жекеменшік IT-мектептерге қолдау көрсетуді тапсырды. Оқыту ұзақтығы 6 айдан 2 жылға дейін созылады. Бағдарлама бойынша ІТ-мамандардың бірінші легі 2023 жылдың ортасына қарай дайын болады, – деді Astana Hub IT-стартаптар халықаралық технопаркінің бас директоры Мағжан Мәдиев.
Tech Orda бағдарламасы Astana Hub айналысатын веб-әзірлеу, 3D-дизайн, бағдарламалық және аппараттық құралдар жасау, мобильді қосымшалар әзірлеу, Big Data, Blockchain секілді негізгі басым секторларды қамтиды. Оқыту қазақ, орыс және ағылшын тілдерінде жүргізіледі.
Бұл бағдарлама 2021 жылы қанатқақты режімде іске қосылып, Қазақстанның түкпір-түкпірінен 100 студентті қамтыған болатын. Олардың әрқайсысына 600 мың теңге қаржылай қолдау көрсетілді. 2022 жылдың қыркүйегінде Tech Orda бағдарламасының аясын кеңейту мақсатында ІТ саласына қазақстандық мамандарды даярлауға бөлінетін ваучерлер алу үшін жеке IT-мектептер талапкерлерден өтінім қабылдай бастады.
Жалпы бағдарламаға қатысу үшін 70 ІТ-мектептен өтініш түскен. Нәтижесінде, тәуелсіз комиссияның шешімі бойынша ІТ саласының түрлі бағыттары қамтылған 146 курс ұсынған 49 ІТ-мектеп іріктелді. Арнайы жасалған алгоритмнің математикалық моделі негізінде осы мектептерге 3 мыңнан астам ваучер таратылды.
Бағдарламаны әзірлеу кезінде респу- блика аймақтарында IT-білім беруді қолдауға ерекше көңіл бөлінді. 2021 жылмен салыстырғанда өңірлік өкілдік айтарлықтай өскені байқалады – өңірлерден 17 IT-мектеп (35 пайыз) таңдалды. Оның ішінде Ақтау (1), Ақтөбе (1), Атырау (3), Қарағанды (2), Қызылорда (1), Павлодар (3), Семей (2), Орал (1), Шымкент (2) қалалары бар.
Мектептер таңдалған IT-мамандықтың ерекшелігі мен әлеуетті үміткерлердің дайындық деңгейіне байланысты бір ай ішінде студенттерді іріктеудің бірнеше кезеңін өткізді. Ваучерге ие болған студенттер тізімі негізінде Astana Hub пен ІТ-мектептер арасында келісімшарттар жасалды.
Былтыр Tech Orda бағдарламасы бойынша оқуға 16 мыңдай өтініш түскен. Іріктеу нәтижесінде 3 068 студент ваучерге қол жеткізіп, IT-мамандығы бойынша білім ала бастады.
Tech Orda бағдарламасы бойынша қызметі мен мамандығына қарамастан, Қазақстанның 18-45 жас аралығындағы кез келген азаматы оқи алады.