Бүгін Аустралияның Мельбурн қаласында теннистен «Үлкен дулыға» санатындағы ең ірі төрт турнирдің бірі – Аустралияның ашық біріншілігінің жалауы желбірейді. Жүлде қоры 51,5 миллион АҚШ долларын құрайтын жарыстың жекелей бәсекесінде үш отандасымыз өнер көрсетеді. Күні кеше жарыстың жеребесі тартылып, Қазақстан теннисшілерінің алғашқы айналымдағы қарсыластары белгілі болды.
Мельбурндегі жарысты бірінші болып жерлестерімізден Қазақстанның бірінші, әлемнің 23-ракеткасы Елена Рыбакина бастайды. Ол бүгін алғашқы айналымда дүниежүзілік рейтингте 67-орында тұрған италиялық Элизабетта Коччаретомен шеберлік байқасады. Екі теннисші бүгінге дейін кортта бір мәрте кездескен. 2017 жылы АҚШ ашық біріншілігінің 1/8 финалында Рыбакина италиялық теннисшіні екі сетте – 6:4, 6:0 есебімен еш қиындықсыз жеңген болатын. Егер, Рыбакина екінші айналымға өтіп жатса, әлемдік рейтингте 106-орында тұрған 22 жастағы словениялық Кайя Йуван немесе 20 жастағы франциялық Селена Яничиевичпен (185) ойнайды.
Ал ертең ерлер арасында Қазақстанның бірінші, әлемнің 36-ракеткасы Александр Бублик рейтингте өзінен төрт саты жоғары тұрған испаниялық Алехандро Давидович-Фокинамен кездеседі. Бұл теннисшілер де әзірге өзара тек бір мәрте шеберлік байқасқан. 2021 жылы Барселона корттарында өткен бәсекенің алғашқы кезеңінде Бублик қарсыласын үш сетте – 2:1 (2:6, 7:5, 6:2) есебімен тізе бүктірген. Александрдың екінші кезеңдегі ықтимал қарсыластары – 32 жастағы германиялық Ян-Леннард Штруфф (167) пен 35 жастағы америкалық Томми Пол (35).
Сондай-ақ ертең әлемдік рейтингте 51-сатыда тұрған Юлия Путинцева әлемнің 43-ракеткасы румыниялық Сорана Кырстямен сайысқа түседі. Путинцева мен Кырстя бір-біріне өте жақсы таныс теннисшілер. Өйткені олар қазірге дейін кортта бес мәрте кездескен. Үш бәсекеде жерлесіміздің мерейі үстем болған болса, екеуінде румыниялық теннисшінің бағы жанған. Соңғы рет екі теннисші 2019 жылы Германиядағы турнирде бір-біріне қарсылас атанған. Сол жолы Юлия екі сетте – 6:4, 7:5 есебімен басым түскен. Егер Путинцева екінші айналымға шығып жатса, қытайлық Сю Ван (49) немесе чехиялық Каролина Плишковамен бақ сынайды.
Ал жұптық бәсекеде өнер көрсететін Андрей Голубев – Александр Недовесов, Александр Бублик – Джон-Патрик Смит (Аустралия), Анна Данилина – Саня Мирза (Үндістан), Елена Рыбакина – Анастасия Павлюченкова (Ресей) және Юлия Путинцева – Софья Кениндердің (АҚШ) қарсыластары кейінірек белгілі болады.