АҚШ-тың Лэйк-Плэсид қаласында өтіп жатқан қысқы Универсиадада шайбалы хоккейден Қазақстан құрамасы қатарынан үш ойында қарсыластарын ірі есеппен тізе бүктірді.
Ғалым Мәмбетәлиев жетекшілік ететін жерлестеріміз үшінші турда Ұлыбритания құрамасына еш мүмкіндік қалдырмай, 15-1 есебімен тас талқанын шығарды. Бірінші кезеңде Қазақстанның студент хоккейшілері қарсыластарының қақпасына алты шайба енгізсе, кейінгі екі кезеңде тағы тоғыз мәрте мергендік танытты.
В тобында сынға түсіп жатқан Қазақстанның студенттер құрамасы бірінші турда Корея хоккейшілерін 5:1 есебімен тізе бүктірсе, екінші турда Мажарстан құрамасын 9:1 нәтижесімен сүріндірген-ді. Жерлестеріміз келесі ойынын 17 қаңтарда Словакия, 18 қаңтарда АҚШ құрамасымен өткізеді. А тобында Канада, Чехия, Жапония, Латвия, Швеция және Украина хоккейшілері бақ сынап жатыр. Плей-офф кезеңіне әр топтан бірінші және екінші орын алған командалар шығады.
Қазақстан құрамасы медаль кестесіндегі жалпыкомандалық есепте 1 алтын медальмен Эстония екеуі 9-орынды бөлісіп тұр. Жалғыз жүлдені ел қоржынына биатлоншы Вадим Куралес салған еді.