ҚАЗАҚСТАН КЕДЕН ОДАҒЫНА ҚАТЫСТЫ КЕЛІССӨЗДЕРДЕ ӨЗ МҮДДЕСІН БЕРІК ҚОРҒАУДА

Кеше Қазақстан Республикасының Премьер-Министрі Кәрім Мәсімов Кеден одағына қатысты мәселелерді талқылау үшін Санкт-Петербург қаласына ұшып келді.

Сұңғат ӘЛІПБАЙ  – Санкт-Петербургтен.

Осы қалада осыдан 4 күн бұрын ғана Тәуелсіз Мемлекеттер Достастығына, Еуразиялық эко­но­микалық қоғамдастыққа  және осы қоғамдастық аясында құрылған Кеден одағына мүше елдер үкімет басшыларының кездесуі өткендігін еске сала кетпекпіз. Сол кездесуде Кеден одағына мүше елдердің үкі­мет басшылары аясында одақтың санитарлық, малдәрігерлік сани­тар­лық, фитосанитарлық шара­ларын қолдануды реттеу, одақтың басты құжаты Кеден кодексін жү­зеге асыруға байланысты жасалған іс-шаралар жоспарын халықаралық келісімге сәйкестендіру, өзара сау­да қатынастарын реттеу, кедендік баж салығын реттеу және басқа да мәселелер қаралған еді. Кеден одағы аясында бас­қо­сулардың­ қай-қайсысында болмасын Қазақстан басшылығы өз елінің мүддесін берік қорғау үстінде. Өткен жолы да солай болған еді. Сондықтан Ресей мен Қазақстан арасында үшінші елдерден ен­гі­зі­летін тауарларға қатысты бірқатар мәселелер қайта қарау үшін сарапшылар кеңесіне тапсырылған болатын. Осы жолы Қазақстан Пре­мьер-Министрі Кәрім Мәсімов пен  Ресей Федерациясы Үкі­метінің Төрағасы Владимир Путин ара­сында өткен кездесуде осы мәселелер келіссөздің негізгі тақырыптарының бірі болды. Келіссөздер барысында же­келеген уағдаластықтарға қол жеткізілді. Бұл жайында келесі нөмірде жан-жақты баяндайтын боламыз.