Бүгінде еліміз жаңа саяси кезеңнің алдында тұр. Бұл бағыттағы маңызды қадам Мәжіліс депутаттарының кезектен тыс сайлауы болмақ. Депутаттыққа кандидаттарды тіркеу кезеңі аяқталды. Алғаш рет сайлауға Мәжіліс депутатының мандатына үміткер жеті саяси партия қатысып отыр. Нағыз саяси бәсеке қыза түсті.
Партиялардың республикалық штабы ашылып, сайлауалды үгіт-насихат кезеңі өңірлерде жан-жақты жүргізілді. Кандидаттар біртіндеп халықты сайлауалды бағдарламасымен таныстырып жатыр. Бүгінгі қарқынды дамып келе жатқан цифрлық ортада халық пен саяси партиялар арасындағы байланыс мүмкіндіктері бұрын-соңды болмаған деңгейде. Өйткені сайлауалды науқан мен кандидаттар туралы ақпарат бұрынғыдан бірнеше есе жылдам әрі оңай таралады.
Медиа кеңістіктегі артықшылықтар да анық сезіліп отыр. Әрине, бұл жерде сайлаушылармен тікелей араласу, объективті деректер негізінде сайлау додасында жеңіске жету мүмкіндігін талдау, жастарды саяси үдерістерге тарту (электоралдық белсенділікті арттыру) мүмкіндігі өсті. Ашық ақпараттық кеңістіктегі коммуникация ең алдымен демократиялық қағидаларды көрсетеді. Орталық сайлау комиссиясы өкілінің мәлімдемесінен белгілі болғандай, ақпараттық кеңістік пен сайлау алдындағы іс-шаралар арқылы үгіт-насихат жұмыстарын жүргізумен қатар, үгіт материалдарын шығару да онлайн платформалар арқылы да жүзеге асырылып келеді.
Тағы бір айта кетерлік жаңалық, енді әрбір бұқаралық ақпарат құралының бір өкілі және телеарналардың үш өкіл дауыс беру күні қызметтік куәлігін көрсетіп, сайлау учаскесіне кіруге мүмкіндік алды. Бұл мінсіз мемлекеттік саясаттың ашықтық қағидатына негізделгенін көрсетеді.
Айжан МОЛДАҒАЛИЕВА,
Қазақстан Стратегиялық зерттеулер институтының аға сарапшысы