Түркістандық жастар бейбіт өмір сүрудің, толерантты қоғам, сондай-ақ конфессияаралық диалог құрудың бірегей қазақстандық моделімен танысты. Қожа Ахмет Ясауи атындағы Халықаралық қазақ-түрік университетінде теология факультетінің магистранттары мен студенттеріне Н.Назарбаев Конфессияаралық және өркениетаралық диалогті дамыту орталығының төрағасы Болат Сәрсенбаев «Діндер съезінің маңызы» тақырыбында дәріс оқыды.
Дәріс барысында Болат Серғазыұлы Әлемдік және дәстүрлі діндер көшбасшыларының VII съезі мен оның қорытынды декларациясының негізгі хабарламалары іс-шараның нәтижелері туралы әңгімеледі. Съезд шеңберінде қабылданған, саясаткерлер, халықаралық ұйымдардың жетекшілері қол қойған, қорытынды құжат саналатын декларацияның міндеттерін жүзеге асыру, идеяларын одан әрі ілгерілету маңызды екені айтылды.
«Әлем халықтарының бейбіт өмірі үшін әрбір адам өз үлесін қосуы керек. Сіздер таңдаған дінтану, теология және исламтану мамандықтары – бүгінгі таңда әлемдік деңгейдегі ең сұранысқа ие мамандық. Бұл мамандық сіздерге әлемдегі болып жатқан хаостарды тоқтататын, әрбір адамның жүрегіне жол тауып, сөнген үмітті жағатын, үзілген үмітті жалғайтын мол жауапкершілік жүктейді. Рухани һәм тарихи-мәдени құбылыстарды жете меңгеріп, адам болмысының әр-қырына үңілетін дінтану-теология саласының мамандарынан мемлекет үлкен үміт күтеді.
Қоғамның әрбір өкілінің жүрегіне ертеңгі күнге деген үлкен сенімге жетелейтін, дұрыс бағыт көрсетуге тиіс те осы саланың мамандары. Сондықтан аталған саланың мамандары төл тарихымызды терең білуі керек. Еліміздің тарихы өте бай, оны үнемі оқып, үйренуден жалықпауымыз керек. Тарихтан сабақ алып, болашақтың игі кәдесіне жарата білуіміз керек. Сіздерден туған өлкенің дін тарихын, салты мен дәстүр ерекшелігін, ұлттық құндылықтарымыздың қалыптасу кезеңдері, танымдық ерекшеліктеріміз сияқты құбылыстарды бағамдай алатын мамандар шығады деп үміттенеміз», деді Болат Серғазыұлы.
Сондай-ақ орталық төрағасы өзі басқарып отырған дамыту орталығының қызметтері жөнінде, оның мақсат-міндеттерін, атқарылған маңызды жұмыстары туралы мәліметтер берді. Студенттер мен магистранттарға Н.Назарбаев Конфессияаралық және өркениетаралық диалогті дамыту орталығы мен Ахмет Ясауи университеті арасындағы меморандум аясында өндірістік тәжірибеден өту мүмкіндігін пайдалануды ұсынды.
Кездесуден соң қонақтар теология факультеті студенттеріннің ұйымдастыруымен өтіп жатқан «Наурыз көже» акциясына қатысты.
ТҮРКІСТАН