Сәтбаев қаласының Санжар Сланбек есімді жасөспірімі екі айдан бері Түркияда ем қабылдап жатыр. Ол 2016 жылы туған. Ауыр науқасқа ұшыраған оның емақысы да әжептәуір соманы құрайды екен.
Жексенбіде қаланың белсенді жастары, жас кәсіпкерлер мен блогерлер Санжарға жәрдемдесу мақсатында жәрмеңке өткізді. Олар жәрмеңкеге қарапайым күнделікті тұтынатын заттарды сатуға шығарып, жиналған қаражатты Санжардың еміне аударды.
Жәрмеңкеге қала әкімі Шапағат Әубәкір арнайы ат басын бұра келді. «Қаланы аралап жүргенде көше бойынан жастардың жарнамасын көзім шалып қалған еді. Сондықтан аз да болса үлесімді қосайын деп келдім», деген қала басшысы бірнеше оқу құралын, т.б. заттар сатып алды. Ол сол жерде тұрып телефон арқылы Санжардың өзімен сөйлесіп, тезірек сауығып кетуіне тілектестігін жеткізді.
Жастардың жақсылық жәрмеңкесінде 1 млн теңгеден аса қаражат жиналыпты. «Көп түкірсе – көл» деген осы.
Абдолла ДАСТАНОВ,
журналист
Ұлытау облысы,
Сәтбаев қаласы