Елдің әлеуметтік-экономикалық даму мәселелері жөніндегі кеңесте, сонымен қатар Үкімет отырыстары мен халыққа жолдаулары, өңірлерді дамыту мәселелері жөніндегі кеңестерде сөйлеген сөздерінен Мемлекет басшысының елдегі жағдайдан жан-жақты хабардар екенін байқауға болады.
Әкімшіліктің мәліметтерді жедел жинап, ұсыныс беретіні түсінікті. Өкінішке қарай, Президенттің кей тапсырмаларының орындалмау не болмаса қағаз жүзінде ғана орындалу үрдісі бар. Проблемалы факторлар да орын алып жатыр: бір жағынан қолайсыз конъюнктура, екінші жағынан атқамінерліктің дәстүрлі іріткісі. Мемлекет басшысының Үкіметтің не болмаса министрліктердің сылап-сипаған цифрларына қарамастан қандай міндеттерге жіті назар аудару қажеттігін еске салып отыруы үшін «қолмен» басқару режіміне баруға мәжбүр екені түсінікті. Президентте шенеуніктер толыққанды және жария етуге құлықты емес аспектілерді қамтитын ақпарат бар. Мемлекет басшысы халықпен кері байланыс мәселесіне де жіті назар аударып отыр.
Президенттің қатысуымен өткен кеңеске барлық деңгейдегі мәслихат депутаттарының шақырылуы жайдан-жай емес. Мәслихат – халық пен жергілікті деңгейдегі мемлекеттің өзара іс-қимылының бірінші негізгі жолы. Кейінгі жылдары мәслихаттардың диалог жүйесінен сырт қалғанын көріп отырмыз. Сайлау өткеннен кейін оларды ұмытатын едік және мәслихаттың тыңдау өткізуі немесе әкімдіктердің жұмысын бақылағаны айрықша біліне бермейтін. Сондықтан да өткен жылы саяси конституциялық реформа аясында мәслихатты жасақтау тәртібі өзгерді, олардың өкілеттігі кеңейді. Бүгінде мәслихатқа үлкен мәселелер тәуелді: сол себепті де олар әкімдік шешімдерін мақұлдайтын филиал емес, олардың жергілікті жерде шешілу жолдарын өзектендіретін және бақылайтын органға айналуға тиіс. Президент те кеңеске жиналған мәслихат өкілдеріне олардың бірінші кезектегі міндеті жергілікті тұрғындардың мүддесін қорғау екендігін, жеңіл-желпі танымалдыққа бой алдырмау керектігін айтты.
Данияр ӘШІМБАЕВ,
саясаттанушы