Ауылдық жердегі халықтың медициналық қызметке қолы жете бермейтіні рас. Сол олқылықтың орнын толтыру мақсатында қазір Әлеуметтік медициналық сақтандыру қорының Ұлытау облыстық филиалының бастамасымен Жаңаарқа ауданына қарасты ауылдардың тұрғындары профилактикалық тексеруден өткізіліп жатыр.
Бұл бастаманың ерекшелігі сол, ауылдағылар денсаулығын тексерту үшін аудан, облыс орталығына ағылмайды. Керісінше, жылжымалы медициналық кешен ауылдарға барады. Құны 156 млн теңге тұратын медициналық кешен – автобустың ішінде денсаулықты сүзгіден өткізуге қажеттінің бәрі бар: дәрігерлердің кеңесі, мамандандырылған медициналық көмек көрсету, диагностикалық және скрингтік зерттеулер жүргізуге мүмкіндік беретін бірнеше кабинет. Хирург, гинеколог, офтальмолог, кардиолог, педиатр, отолоринголог, дантист, жалпы тәжірибелік дәрігерлер мен ЭКГ мейірбикесі, рентген мен УДЗ лаборантына шейін бар кешен осы заманғы медициналық құрал-жабдықтармен жабдықталған. Бір емес, бірнеше маманға бірден қаралып, толыққанды тексерістен өтуге мүмкіндік бар.
– Бұл кешеннің қызметін ауылдағы кез келген тұрғын пайдалана алады. Медициналық сақтандыруы бар ма, жоқ па, бұған қарамайды, бәрі де тегін. Әлеуметтік медициналық сақтандыру қорының Ұлытау облыстық филиалының Жаңаарқа аудандық көпбейінді орталық ауруханасымен жасаған келісімшарты негізінде осы шараға 40 млн-нан аса қаражат қарастырылған. Бұл жұмыс қыркүйек айына шейін жалғасады, дейді «Әлеуметтік медициналық сақтандыру қоры» КеАҚ Ұлытау облысы бойынша филиалының директоры А.Бердібеков.
Жан-жақты ойластыра білсе, кез келген тығырықтан шығатын жол табуға болады екен. Дәрігер толы автобустың қызметі соны көрсетіп отыр.
Ұлытау облысы