Оқырман

Хат қоржын ...ризашылық білдіреді Жылы сөзі де жанға шипа Қай кезде де бас ауырып, балтыры сыздағандарға дер кезінде көмек берілетіні былай тұрсын, ақ халатты абзал жан­дардың білік­­­­тілігі, науқас адамға деген аялы қамқорлығы қажет. Осын­­­дай абыройлы мін­детті түсінген ұжымның бірі – Атырау қала­сындағы №5 қа­­лалық емхана. Мен көп жыл­­дар бойы осы емханаға қа­ра­лып жүрген тұрғын­мын. Бұл емхана «Кезексіз емхана» жүйе­сінде жұмыс істейді. Қала­­ған мезгілімде емхананың элек­трон­дық сайты немесе телефон арқылы алдын ала кезекке жа­зылып, дәрігерлерден ем аламын. Емханада УЗИ, флюорография аппараттары, тоқпен емдеу бөлмесі жақсы жабдықталған. Күндізгі емдеу бөлмесі де қызмет етеді. Бас дә­рігер Күлшара Жұ­мағалиева бастаған дәрігерлер емделушілерді жылы сөзімен де, шипалы емімен де емдейді. Дәрігерлердің өз міндетін адал атқаруының арқасында емделушілерге қызмет көрсету мәдениеті өзгерді. Шындығын айту керек, біз отбасымызбен осындай үлгілі емханада емделіп, қаралатынымызға ризамыз. Расында да, халқына мінсіз қызмет көрсетіп отырған емхана ұжымының еңбегін біз бағалап отырсақ, бұл ауыз­бірлігі жарасқан ұжым мен оның жі­герлі де алғыр басшысының тікелей ең­бегі. Сондықтан да, біз медицина қыз­­мет­керлеріне бұдан былай да халық риза­шылығына бөленіп, еңбектерінің жемісін көрулеріне тілектеспіз. Ақмарал ЖОЛДАСОВА, қала тұрғыны. АТЫРАУ. ...сұрау салады Зейнетақы қорындағы үлесімізді білгіміз келеді Біздер Жамбыл облысының Меркі, Құлан аудандарында орналасқан бір кездердегі Қырғызстанға қарайтын теміржол бекеттерінде 40 жылдан аса еңбек еттік. Ол кезде бұл жол торабы Фрунзе теміржолының бөлімшесі болатын. Бұл мекемеде еңбек еткен 100-ден аса отбасы Кеңес Одағы тарағаннан кейін де сол орнымызда еңбек етіп, көп­­­­­­ші­лігіміз қазір құрметті демалыстамыз. Десек те, қазіргі алып отыр­ған зейнетақымыз мардымсыз. Өйткені, біздің пайымдауымызша, 1993-2005 жылдар аралығындағы зейнет­ақы қорына қосқан үлесіміз ескерусіз қалған сияқты. Іс-қағаз дайындау барысында көрші Қырғызстанның тиіс­ті орындарында болсақ та өтіні­шімізге нақты жауап ала алмадық. Бір ғана мысал, мен өзім осы салада 1959 жылдан 2005 жылға дейін, ал қосағым 40 жыл еңбек етіп демалысқа шыққанмен, қазіргі зейнетақымыз тым аз. Қысқаша баяндай келіп айтарымыз, тиісті орындар осы жағдайымыздың жай-жапсарын анықтап, жөн-жобасын көрсетіп ақыл-кеңес берсе дейміз. Құрметпен 120 темір­жол­шы­ның атынан хат жолдаушы Жақсылық ШАЙЛАЗИМОВ. Жамбыл облысы, Т.Рысқұлов ауданы, Жаңатұрмыс ауылы.  ...ұсыныс жасайды Құрметтің жарқын көрінісі болар еді Мен қарапайым зейнет­­кермін. Шілде айында Астана күні айрық­ша аталып, оған қоса, Елбасымыздың ­туған күні де болып өтті. Президентіміз­дің халқымыз үшін атқарып жатқан ең­бегі ұшан-теңіз десем, артық айтқа­ным емес. Ол туралы тұ­шымды пікірлер мен ойлы мақалалар баспасөз беттерінде айтылды да, жазылды да. Осыған байланысты өз басым ұсыныс жасағым келіп отыр. Елбасының халық үшін жасап жатқан еңбегін бағалап, елор­да­дағы орталық алаңға Президен­тіміз­дің ескерткішін орнатса деймін. Болат ОРМАНТАЕВ, еңбек ардагері. Ақмола облысы, Целиноград ауданы, Максимовка ауылы. ...қауіп етеді Теріс пиғылға тыйым салынса Бүгінде жамағаттың жаппай дін­­ге бет бұруын басқа пиғыл­­­­­дағылар пайдаланып қалуға тырысуда. Әсіресе, шеттен келген әртүрлі ағымдағы діни өкілді­­ктердің өрескел іс-әрекеттері өршіп тұр. Олар әлі де қаншама заңдар қабылдаған мемлекеттік талаптарды толық мойынсынбайтын сыңайлы. Мәселен, Қостанай өңірінде бұрын болып көрмеген көріністер белең ала бастады. Әйел, қыз-келіншектер киімдерін өзгертіп, үстеріне қазақта мүлде болмаған жат киімдер киіп, бас­тарына пәрәнжа жамылатын болды. Қазақ қызының бетін тұмшалағаны қай заманда болып еді! Және де кейінгі кездері осы ғұрыпты ұстанған қыздарымыз шетел азаматымен тұрмыс құрып, әйел үстіне әйел болып кете баруды әдетке айналдырды. Бір біздің өңірде ғана емес, біртін­деп басқа аймақтарда да мысықтабан­дап бой көрсе­­те бастаған мұндай жат қылық­тардың алдын алып, заң-зәкүн­мен қоса әр елді мекендегі дуалы ауыз зиялы қауым өкілдеріне сөз беріп, тыйым салмасақ болмас! Теріс пиғылды жат әрекеттерге қашанда тойтарыс беріп, өзі­міздің әдет-ғұрпымызды сақтауға тырысайық, ағайын! Жаманбай УАҚБАЕВ. Қостанай облысы, Әулиекөл ауданы, Аманқарағай ауылы.  ...қынжылады Үшемнің жағдайы алаңдатады Мен Атырау облысы, Исатай ауданы, Исатай ауылының тұрғынымын, зейнеткер болып табыламын. Сіздерге хат жолдап отырған себебім, осы жылдың қаңтар айында келінім Айнұр Жұмашева үшемді өмірге әкеліп, қуанғаннан тө­беміз көкке екі елі жетпей қалды. Бұрын да алды 2 сыныпта оқитын 3 неме­рем бар еді. Айтарым, балам мен келі­нім осы сәбилерін өсіріп, қатарға қосу үшін қиындықтарға тап болып отыр. Біріншіден, сәбилер өмірге келмей жатып ана сүтінің дәмін алмады, себебі, дәрігерлер оның жұқпалы ауруы бар деп бірнеше күн еміздірмеді. Соның салдарынан келінімнің сүті қайтып кетті. Тексере келе оның ешбір жұқпалы ауруы болмай шықты. Екіншіден, немерелерім үйге келген соң да дәрігерлік бақылау сирек болды. Әлсіз Жүрсін немерем жан­сақтау бөліміне жатқызылып, облыс­тық денсаулық сақтау бөліміне арыз­дануымыздың арқасында сәби­­­лерге дәрігерлік бақылау жөнделе бастады. Балам Медет ішкі істер депар­тамен­тінде, келінім халыққа қызмет көрсе­ту орталығында қызмет жасайды. Екеуі де Атырау қаласында тұрғын үй алу кезегінде тұрса да, жуықта кезек келмейтін сияқты. Қазіргі уақытта сарай үйде тұрып жатыр. Күтуші алуға үй тар, әрі баламның еңбекақысы жетпейді. Осы жағдайларын айтып облыстық, қалалық құзырлы органдарға балам ауызша да, жазбаша да хабарласқан еді, бірақ қанағаттанарлық жауап ала алмады. Сіздердің газеттеріңіздің Атырау облысы бойынша меншікті тілшісі Жолдасбек Шөпеғұлға хабарласып едік, «Үшемге кім жанашыр болады?» деген мазмұнды мақаласы шықты. Бұл мақалаға да елең еткен құзырлы органдар болмай отыр. Әрине, кім-кімде өз ұрпағын өсіруге міндетті. Қолдан келгенше ешкімге алақан жаюға тырыспайды. Біз бір жерлерде үй беріп жатыр, бір жерлерде машина беріп жатыр деген сөздерге еліктеуден аулақпыз. Тек сәбилеріміз аман-есен, дендері сау болып, өсіп-өніп жетіліп кетсе дейміз. Балаларымның қиын жағдайда жүргені жаныма батады. Баспана тарлығы, сәбилерімнің денсаулығы алаңдатады. Әліп ТАЙТАҚБАЕВ, зейнеткер. Атырау облысы, Исатай ауданы, Исатай ауылы.