Тобыл қаласында сатирик жазушы, этнограф ғалым Сейіт Кенжеахметұлы атындағы республикалық әзіл-сықақ театрларының фестивалі аяқталды. «Мірдің оғы» атты дәстүрлі байқауға биыл 12 ұжым қатысты. Оның тоғызы Атырау, Маңғыстау, Түркістан, Қызылорда, Жамбыл, Павлодар облыстарынан келген қалалық және аудандық деңгейдегі театрлар.
Байқаудың алғашқы кезеңінде Сейіт Кенжеахметұлының осыдан отыз-қырық жыл бұрын «Тамаша» ойын-сауық театрында қойылған шығармалары сахналанды. Осылайша, кезінде Уайыс Сұлтанғазин, Мейірман Нұрекеев, Тоқсын Құлыбеков, Құдайберген Сұлтанбаев, Тұңғышбай Жаманқұлов сынды сахна саңлақтары сомдаған қисық кейіпкерлер «Мірдің оғы» арқылы қайта тіріліп, қалың көрерменімен
қайыра қауышты. Байқаудың қорытынды кезеңінде театрлардың бәріне бірдей өз қалаулары бойынша дайындап әкелген қойылымдарын көрсетуге мүмкіндік берілді.
Ұйымдастырушылардың айтуына қарағанда, аталған байқаудың, әсіресе, республикалық деңгейдегі сахналарға шығуға мүмкіндігі аз, көбіне-көп аудан, ауыл көлемінде ғана өнер көрсетіп жүрген көркемөнерпаздар өкілдерінен құрылған қатардағы театрларға берері мол.
Биылғы фестивальдың ең басты жаңалығы – тұңғыш рет сатира сардары Көпен Әмірбекұлы атындағы арнайы сыйлықтың тағайындалуы.
– Осы байқаудың басында Көпен ағамыз жүруші еді. «Мірдің оғы» биыл бірінші рет Көпенсіз өтіп отыр, әрине, көңіл құлазытады. Ол кісінің Сейіт Кенжеахметұлына деген құрметі ерекше еді. Былтыр науқасына қарамастан, қайтсем де барам деп осында келіп, үстелде көп отыра алмай, диванға барып жантайып жатып жас театрлардың өнерін бағалап, ақыл-кеңесін айтып кетті. Көпен ағаның бір көрініп кеткенінің өзі неге тұрады? Былтыр осы байқауға келіп-кеткеннен кейін, бір жетіден кейін қайтыс болды. Мұның өзі сатира сардарының Сейіт ағасына деген ықылас-құрметінің ерекше болғанын көрсетеді, – дейді қазылар алқасының мүшесі, ақын Абылай Мауданов.
Қазылар алқасының ұйғаруымен байқаудың бас жүлдесі Түркістан облысы Кентау қаласынан келген «Күлкі терапеясы» әзіл-сықақ театрына бұйырды. Ал Жамбыл облысы Тұрар Рысқұлов ауданының «Басқар Битанов» халық театры бірінші орынды жеңіп алды. Екінші орынды Жаңаөзен қаласының «Бостан» әзіл-сықақ театры еншілесе, Қызылорда облысының Шиелі ауданынан келген «Жадыра» әзіл-сықақ театры үшінші орынды қанағат тұтты. Павлодар облысы Май ауданының Мерзихан Шайхин атындағы халық театры Көпен Әмірбек атындағы арнайы сыйлықты иеленді. Ал байқауға Қостанай ауданынан қатысқан «Күн мен Түн» әзіл-сықақ театры Ғұмар Ахметчин атындағы сыйлықты алды.
Қостанай облысы