Кипрдің бас шаһары – Никосияда ұйымдастырылған шахматтан әйелдер арасындағы ФИДЕ Гран-при жарысының төртінші кезеңі өз мәресіне жетті. Бұл сында 24 жастағы германиялық гроссмейстер Динара Вагнер жеңіске жетті.
Осыдан бір ай бұрын ғана Үндістанда өткен Гран-придің үшінші кезеңінде үздіктер қатарынан көрініп, күміс жүлдеге ие болған Бибісара Асаубаева Кипрдегі жарыстың шешуші кезеңінде алтыншы орынға тұрақтады. Отандасымыз 11 турда 5,5 ұпай жинап, үшінші кезеңде жеңімпаз атанған ресейлік Александра Горячкинамен, сонымен қатар грузиялық гроссмейстер Нана Дзагнидзе және әзербайжандық халықаралық шахмат шебері Гюнай Мамедзадемен алтыншы орынды өзара бөлісті. Ал 11 матчта 7 ұпай жинаған Динара Вагнер Кипрдегі Гран-придің жеңімпазы атанса, Вагнерден жарты ұпайға қалып қойған ресейлік Полина Шувалова, қытайлық Тань Чжунъи және үндістандық Харика Дронавалли кейінгі орындарға ие болды.
Осылайша, әйелдер арасындағы Гран-при жарыстарының қорытындысы бойынша ең көп ұпай жинаған ресейлік шахматшылар Екатерина Лагно мен Александра Горячкина келесі жылы Канаданың Торонто қаласында өтетін үміткерлер турниріне жолдама алды.