Бір кездері аналарымыздың қолынан түспеген ұршық бүгінде естелікке, жәдігерге айналып барады. Бұрын қолына ұршық ұстамаған жанды кездестіру сирек болса, қазір ұршықты шырқ үйіретіндерді ауыл-ауылдан іздеп тауып, өзара сайыстыру да қасиетті мұраны жоғалтпаудың, насихаттаудың бір дәлелі.
Мамыр айының мамыражай күндерінің бірінде Ақтау қаласында Маңғыстау облыстық ғылыми-әдістемелік және мәдени қызмет көрсету орталығының қолдауымен «Сөз бен саз» бағдарламасының «Ұмытпайық, ұлықтайық ұршықты» атты рухани іс-шара өтті. Өңірдегі екі қала мен бес ауданнан қатысқан 46 үміткердің ішінен іріктеу турынан 15 үміткер өтті. Қатысушылар арасында 73 жастан асқан әжелер мен 39 жастағы аналар бар. Өлкеге танымал көнекөз апалар қазылық еткен сайыста ширек финалға он адам өтіп, өз кезегінде жартылай финалға жеті адам жіберілді, ал ақтық сында 5 үміткер бақ сынасты. Нәтижесінде, Мұнайлы ауданынан келген ең жас қатысушы В.Палуанова бас жүлдегер болып, Маңғыстау облыстық ғылыми-әдістемелік және мәдени қызмет көрсету орталығы тағайындаған 150 000 теңгеге ие болды. Өзге де жүлдегерлерге бағалы сыйлықтар табысталды. Сайыс барысындағы концертке өңірге танымал өнерпаздар мен «Жібек» жетіген мектебі, «Нарату» домбырашылар ансамблі және «Арна» тобы қатысты. Аулада ұлттық қолөнер шеберлері мен ұлттық тағамдардың көрмесі ұйымдастырылып, жеңіске жете алмаса да қатысқан барлық үміткер ұлттық нақыштағы сыйлықтармен, алғыс хаттармен марапатталды.
Ақ жаулықты әжелер ұлттық құндылықтарды насихаттайтын рухани шаралардың жиі ұйымдастырылуына тілекші екендіктерін, тек сайысып қана қоймай, осындай байқаулар арқылы жастарға өз білгендерін үйретуге болатындығын жеткізді.
Маңғыстау облысы