Төлеби ауданы Алғабас елді мекеніндегі жалпы орта мектепке мемлекет және қоғам қайраткері Сәдуақас Темірбековтің есімі берілуіне байланысты арнайы іс-шара өтті. Ғалымның бюсті мен мұражай кабинеті ашылды.
Жиында көрнекті ғалым-педагог, мәдениеттанушы, философ, профессор Сәдуақас Темірбековтің өмір жолынан естеліктер айтылды. Елге сіңген еңбегі туралы баяндама жасалды. Ауылдан жырақ жүрсе де туған жерге қамқорлық танытып, шапағатын тигізген ғалым талапты, оқуға, білімге ұмтылған жастардың жоғары оқу орнына түсуіне жәрдем беріп отырған. Сондай-ақ Орталық Комитеттің ғылым және оқу орындары бөлімін басқарған жылдары Алматы сәулет-құрылыс және Алматы театр-өнер институттарының, Қостанай мен Көкшетаудағы ауылшаруашылық институттарының, Қарағанды педагогикалық институтының ашылуына ықпал етті. Еңбегі халық тарапынан жоғары бағаланды.
Ғылыми-педагогикалық қызметінде С.Темірбеков жүйелі түрде мәдениеттің тарихы мен теориясын түбегейлі зерттеумен айналысқан. Алғашқылардың бірі болып, «Мәдениеттануға кіріспе» атты университет студенттеріне арналған оқулық жазды. Оның қаламынан 70-тен аса мәдениеттің өзекті мәселелеріне арналған ғылыми мақала туған. Қазақтың рухани дүниесін молайтуға, жаңғыртуға үлес қосқан тұлға 35 жасында, яғни 1967 жылы жаңадан ашылған Шымкент педагогикалық мәдениет институтының ректоры болып тағайындалған. С.Темірбеков басшылық еткен жылдарда кафедралардың саны бесеуден 13-ке, оқытушылар саны 137-ге жеттi. Оқу орнын басқарған 11 жылда институттың материалдық базасы қалыптасып, профессорлық-педагогикалық құрам жинақталды, көптеген жетістікке жетті. Профессор С.Темірбековтің жетекшілігімен философия ғылымдары саласында үш кандидаттық диссертация қорғалды.
– Өткен ғасырда Қазақстанды Колбин басқарған кезеңде ол қуғын-сүргінге түскен ұлт тұлғаларын қорғау жағында болғаны мәлім. Академик Өмірбек Жолдасбековтің жазықсыз жаладан басына іс түскенде жанынан табылып, қолынан келген жақсылығын аянып қалған жоқ. Сол бір қиын-қыстау кезеңде шын достықты, шынайы жанашырлықты көрсете білді. Сәдуақас ағамыз дүние жинаған жоқ. Адал қызметімен, өнегелі өмірімен абыройлы болды. Ауылы ғана емес ел мақтан тұтатын азамат еді, – дейді аудандық ардагерлер кеңесінің төрғасы Әтірхан Шыңғысбаев.
С.Темірбеков атындағы жалпы орта мектептің директоры Медет Балықбаевтың айтуынша, мектептің атауын өзгерту, ғалымның есімін беру мәселесі осыдан 6 жыл бұрын 2016-2017 оқу жылының соңында өткен үлкен жиналыста көтерілген екен. «Жиында ұйымдастыру алқасы құрылды. Сол уақытта бастау алған іс оңынан шешіліп, республикалық ономастикалық комиссиясының шешімімен мектебіміздің атауы 2023 жылдың 20 қаңтарынан бастап «Сәдуақас Темірбеков атындағы жалпы орта мектебі» болып өзгертілді. С.Темірбековтің інісі Амангелді және немере інісі Ильяс Төребекұлы демеушілік жасап, мектеп ғимаратының сыртын күрделі жөндеуден өткізіп, заманауи үлгідегі сайдингпен қаптап берді. Оларға мектеп ұжымы атынан айтар алғысымыз шексіз», дейді мектеп директоры.
С.Темірбековтің шарапаты ауылдың бүгінгі жас ұрпағына да тимек, яғни мектеп оқушыларын қолдау мақсатында биылғы үздік түлекке университет гранты берілмек. «Университеттің шешіміне сәйкес, Темірбеков мектебінің биылғы үздік түлегіне М.Әуезов университетінің гранты беріледі. Грант иесі бакалавриат деңгейінде 4 жыл тегін білім алады. Талапкер мәдениет және өнер факультетінің білім беру бағдарламасын таңдай алады. Бұл – профессор Темірбековтің салып кеткен сара жолының заңды жалғасы. Өйткені профессор Темірбеков өз заманында оқуға құштар, білімге талапты жастарды қолдап, жағдай жасаған. Біз де осы тамаша дәстүрді бұзбай Темірбеков мектебінің түлегіне қолдау ретінде оқу грантын табыстаймыз», деді М.Әуезов атындағы Оңтүстік Қазақстан университеттің ректоры Дария Қожамжарова.
– Көпшілікке Сәдуақас атам ірі мемлекет қайраткері және белгілі ғалым, ал бізге, немерелері үшін әр уақытта ынта-ықыласымызды қолдайтын, ақ батасын беріп, жол сілтейтін асқар тау еді. Немерелерінің тұлға болып қалыптасуына Сәдуақас атам мен Фарида апамыздың кеңпейілділігі мен балажанды жарқын бейнесі көп әсер етті, – дейді ғалымның немересі, экономика ғылымдарының кандидаты Жанар Темірбекова.
Түркістан облысы