Маусымның 19-нан 20-сына қараған түні Белфастта футболдан 2024 жылғы Еуропа чемпионатының іріктеу турнирі аясында Солтүстік Ирландия мен Қазақстан құрамалары арасында матч өтеді, деп хабарлайды Egemen.kz Sports.kz сайтына сілтеме жасап.
Солтүстік Ирландия - Қазақстан матчының тікелей трансляциясын Qazsport телеарнасынан көруге болады. Басталуы Астана уақыты бойынша 00:35-те.
Еуро-2024 іріктеу кезеңінде үш ойын өткізген Қазақстан құрамасының қоржынында алты ұпай бар. Магомед Адиевтің шәкірттері турнирдегі ойынын сәтсіз бастады, Словениядан ұтылды (1:2), бірақ кейін сенсациялық түрде Дания құрамасын (3:2) жеңіп, Сан-Марино командасын да (3:0) жеңді.
Солтүстік Ирландия құрамасына келсек, үш ойыннан кейін үш ұпайы бар. Солтүстік ирландиялықтар да Сан-Мариноны жеңді (2:0), бірақ Финляндия (0:1) мен Даниядан (0:1) ұтылды.