Тараз қаласындағы «Анаға тағзым» отбасын қолдау орталығында «Мерейлі отбасы – 2023» ұлттық байқауы өңірлік кезеңінің қорытындысы шығарылып, марапаттау рәсімі ұйымдастырылды. Іс-шараға облыс әкімі Нұржан Нұржігітов қатысып, байқау қорытындысында үздік атанған отбасыларды марапаттады.
«Бүгінгі бала – ертеңгі болашағымыз. Жас ұрпақты тәрбиелеуде ата-ананың рөлі мен отбасы құндылығының маңызы орасан зор. Өңірде өнегелі отбасылар аз емес. Қазақ халқы қай кезде де үлкенді қадірлеген. Ұлттық дәстүрден тамырын үзбеген отбасылардың әрбір ұлағатты ісіне шын көңілмен қуанамыз. Еліміз бойынша алтыншы рет ұйымдастырылып отырған бұл байқаудың жамбылдықтар үшін маңызы зор екені мәлім. Өйткені үлгілі, мерейлі отбасы – қоғам айнасы», деді өңір басшысы марапаттау рәсімінде сөйлеген сөзінде.
Байқау қорытындысына сәйкес, өңірлік кезеңде қарсыластарынан оқ бойы озық болған шулық Мадалиевтер отбасы бас жүлдеге лайық деп танылса, мойынқұмдық Исабековтер отбасына жүлделі бірінші орын бұйырды. Сондай-ақ жүлделі екінші орынды тараздық Сметовтер мен Өтеповтер отбасы өзара бөліссе, үздік үштікті жуалылық Сұрымбаевтар және таластық Иманбаевтар отбасы қорытындылады.
Марапаттау рәсімінің соңында сөз алған Мадалиевтер отбасының отанасы Шымшық Мадалиева өңірлік байқаудың ұрпақ тәрбиесіндегі маңызына тоқталды. Ал өңірлік кезеңнің жеңімпаздары мен жүлдегерлері қомақты қаржылай сыйлыққа ие болды.