Премьер-министрдің орынбасары Серік Жұманғарин ТМД Экономикалық кеңесінің 99-отырысына қатысты.
Отырыста атап өтілгендей, ТМД интеграциялық байланыстарды тереңдету және елдеріміз арасындағы көпжоспарлы ынтымақтастықты қолдау үшін тиімді платформа ретінде әрекет етуді жалғастырып келеді.
Негізгі бағыттардың бірі – елдердің сауда-экономикалық байланыстарын кедергісіз нығайту.
Достастық елдерінің көлемді әрі дамып келе жатқан нарығы, минералды-шикізат ресурстарының үлкен қорлары, қатысушы мемлекеттердің экономикалық өзара толықтырылуы, елеулі ғылыми-техникалық әлеуеті және көлік жолдарының болуы өңірдегі көпжоспарлы интеграция үшін қолайлы жағдайларды қамтамасыз етеді.
ТМД шеңберіндегі транзиттік әлеует – елдердің экономикасына оң әсер ететін және оны инвестициялар үшін тартымды ететін негізгі стратегиялық ресурстардың бірі.
Достастық елдерінің аумағындағы өзара тиімді іс-қимылға көбінесе ТМД-ның еркін сауда келісімін және қызметтердің еркін саудасы туралы келісімді іске асыру ықпал етеді.
2023 жылдың бірінші жартыжылдығының қорытындысы бойынша ТМД елдерінің тауар айналымы 20,6 млрд долларды құрады. Бұл өткен жылдың сәйкес кезеңімен салыстырғанда (19,8 млрд доллар) 4,4%-ға жоғары. 2023 жылғы қаңтар-шілдеде Қазақстаннан ТМД елдеріне экспорт 19,4%-ға өсіп, 9,2 млрд долларға жетті.
Отырыстың қатысушылары экономикалық өзара іс-қимылдың өзекті мәселелері бойынша пікір алмасты, өткен бес жылдағы ТМД-ның салалық ынтымақтастық органдары қызметінің экономика саласындағы нәтижелерін қарады, 2019-2022 жылдардағы ветеринария саласындағы ынтымақтастық жөніндегі үкіметаралық кеңес қызметінің нәтижелерін және басқа да мәселелерді талқылады.