Қай саланы болсын халықаралық талаптар деңгейіне көтеру керек. Мұнсыз болмайды. Сондықтан шет елдердің тәжірибесін де, қаржысын да пайдаланудың оңтайлы жолдарын іздестірген абзал. Бұдан ұтпасақ, ұтылмаймыз.
Ұлытау облысы басшылығы денсаулық саласына инвестиция тарту мақсатында Франция даму агенттігімен (AFD) тығыз байланыс орната бастады.
Жақында облысқа құрамында аталған агенттіктің 6 маманы бар, халықаралық деңгейдегі сарапшы Александра Тиркюир басқарған арнайы делегация келді. Делегацияны облыс әкімі Берік Әбдіғалиұлы қабылдап, облыстың денсаулық сақтау жүйесінің жағдайы, басым бағыттар, көзделген жобалар, инфрақұрылым мен материалдық-техникалық жарақтандыру мәселелері бойынша кеңінен әңгіме қозғады.
Әлемнің 150-ден аса елінде 4 200-ден астам жобаны жүзеге асырумен айналысып жатқан агенттік облыс басшылығының ұсыныстарына қызығушылық танытты. Делегация өңірдің кейбір медицина мекемелеріне, атап айтқанда, облыстық көпсалалы ауруханаға және «Жезқазған» медициналық орталығына арнайы барып, ондағы емдеу үрдісін көздерімен көрді, пікір алмасты.
Француз тарапы облыстың денсаулық саласына қатысты мәселелерді одан әрі талдау, талқылау қажеттігіне тоқталды. Демек, екіжақты байланыс одан әрі жалғасын табады.
Ұлытау облысы